NAVENDA NÛÇEYAN

Berdevka Wezareta Derve ya DYA’yê Heather Nauert got, "piştî hin hevdîtinên li Washîngtonê pêvajoya derxistina Sûdanê ji nava lîsteyê dikare dest pê bike.

Nauert hevkariya Sûdanê ya 'têkoşîna li dijî terorê' 'silav' kir û diyar kir, di mijarên weke mafên mirovan, azadiya olî û azadiya çapemeniyê de pêşketin pêk hatiye.

Berdevka wezareta derve anî ziman ku derxistina Sûdanê ji nava lîsteyê girêdayî şertê 'domandina reforman e' û wê hevkariya xwe bidomînin.

Sûdan, sala 1993'an ji hêla DYA'yê ve weke 'Welatê piştgiriyê dide terorê' li lîsteya reş hatibû bicihkirin. Mayîna sazkarê El Qaîdeyê Ûsame Bîn Ladîn a li Sûdanê weke hincet hatibû nîşandan.

DYA'yê herî dawî Cotmeha 2017'an fişarên li ser Sûdanê rakiribûn û ji bo pêşveçûna welêt ku bi qeyrana aborî re rû bi rû ye ev biryar weke hêviyekê hatibû dîtin. Lê belê ji ber ku hîn di nava lîsteya 'welatên piştevaniya terorê dike' de ye, zehmet e ku Sûdan razemeniyên navneteweyî bikêşe nava welêt.