QAMIŞLO

Bi sedan şêniyên bajarê Qamişlo cenazeyê şehîd Eymen Elî ji navenda Meclisa Malbatên Şehîdan a taxa Enteriyê ya bajarê Qamişlo wergirtin û bi kerwanekî wesayîtan ber bi goristana şehîd Delîl Sarûxan ve ketin rê.

Li goristanê ji bo bîranîna cangoriyên azadiyê deqeyeke rêz hate girtin û ji aliyê şervanên YPG û YPJ‘ê ve merasîma leşkerî hate lidarxistin.

Paşê endamê Meclisa Malbatên Şehîdan Hesen Dahir sersaxî ji malbata şehîd re xwest û got:"Em di merheleye hesas re derbas dibin, Tirkiyê gefên êrîşkirinê dixwe, divê em xwe bi rêxistin bikin û parastina herêm û destkeftiyên xwe bikin."

Ji fermandarên YPG`ê Mistefa Qamişlo jî axivî û wiha got:"Em bejna xwe li hember şehîdan ditewînin, em sersaxiyê ji bav û dayika şehîd re dixwazin."

Qamişlo wiha dewam kir:"Beriya çend salan darek biçûk hatibû çandin û bi xwîna şehîdan hate avdan, îro em berhema wê dara mezin dibînin, ew dara malbatên şehîdan e ku bi xwîna zarokên xwe av dan ji Til Hemîs heta Reqa û Tebqa û Dêrazorê, em soza didin em ê heta dawiyê li ser rêyan wan bin."

Paşê fermandarê QSD`ê Lewend Welat axivî û wiha got:" Şerê Tinekirina Terorê li gundên Dêrazorê di merheleyên dawî de ye, çeteyên DAIŞ`ê rojên xwe yên dawî dijî."

Paşê birayê şehîd, Tolhildan Qamişlo axivî û soza berdewamkirina rêya şehîdan da.

Paşê nasnameya şehîd hate xwendin û radestî malbatê hate kirin.

Di dawiyê de cenazeyê şehîd di nava dirûşmeyan spartin axê.

(jo)

ANHA