Artêşa Wetenî nuqteyên stratejîk ên li Terablusê girtin

Artêşa Wetenî ya Lîbyayê ya bi serkêşiya Xelîfe Hefter piraniya nuqteyên stratejîk ên li derdora bajarê Terablusê û balafirgeha navdewletî xistin bin serweriya xwe. Her wiha agahî hene ku hindik maye bajêr bixin bin serweriya xwe.

Berdevkê Artêşa Wetenî ya Lîbyayê Ehmed Mismarî ji Skynews re ragihand ku çalakiyên wan bi awayekî pir baş derbas dibin û derbasî taxên başûr û başûrê rojavayê bajêr bûne, li wê derê şerên dijwar rû didin û wiha got: "Komên çekdar hewl didin rêya Um Wadî Rebî ku yek ji rêyên stratejîk e, vegerînin. Em niha di 7 eniyan de bi pêş de diçin."

Mismarî destnîşan kir ku artêşê gelek herêm û eniyên stratejîk ên derdora balafirgeha Terablusê ya navdewletî, her wiha rêyên rojavayê paytext careke din xistin bin serweriya xwe. Ew enî paytext û herêmên başûr û başûrê rojhilat bi hev ve girê dide.

Li gorî ku çavkaniyan ji Skynews re diyar kir ku balafirên şer ên girêdayî hikumeta Wîfaqê 4 caran navendên artêşa Lîbyayê li Sûka Pênşemê û Cindûbê bombebaran kirin. Her wiha bajarê Misrata û Zintan alîkarî şandin da ku destekê bidin komên çekdar ên li Terablusê.

Tê zanîn ku Artêşa Wetenî ya Lîbyayê di çarçoveya operasyona leşkerî ya berfireh a bi navê "Tofana Kerame" de ku roja pêncşemê ji bo rizgarkirina paytext ji komên çekdar, ber bi Terablusê ve diçe.

(bx)


Mijarên Din