​​​​​​​Berxwedana girtiyên siyasî li dijî tecrîdê 93 roj in ranewestiyaye

Berxwedana greva birçîbûnê ya girtiyên li girtîgehên dewleta Tirk li dijî tecrîda li ser rêber Abdullah Ocalan, 93 roj in didome. Grevên birçîbûnê yên li Mexmûr û Yewnanistanê jî dewam dikin.

Girtiyên siyasî yên ji doza PKK û PAJK’ê di 27’ê Mijdara 2020’an de bi armanca bidawîkirina tecrîda li ser rêber Abdullah Ocalan ku 22 sal in li Girtîgeha Îmraliyê ya Tîpa F a Ewlehiya Bilind girtî ye û binpêkirinên mafên mirovan ên li girtîgehan zêde bûne, dest bi çalakiya greva birçîbûnê ya bêdawî û bidorveger kirin.

Çalakiya girtiyên siyasî ku koma 19’emîn dewr girtiye di roja 93’yemîn de dewam dike.

MEXMÛR

Li Wargeha Penaberan a Mexmûrê, jinan di 18’ê Kanûna 2020’an de li dijî tecrîdkirina rêber Abdullah Ocalan çalakiya greva birçîbûnê da destpêkirin. Çalakiya ku li Saziya Malbatên Şehîdan a Mexmûrê dest pê kir, di roja 72’yemîn de didome.

YEWNANISTAN

Penaberên ku li Kampa Lavrîo ya Yewnanistanê dijîn jî ji bo bidawîkirina tecrîdkirina rêber Abdullah Ocalan û piştgiriya çalakiya greva birçîbûnê ya li girtîgehan dewam dike, dest bi çalakiya greva birçîbûnê kirin.

Ev grev di roja 55’emîn de didome. Tevgera Ciwanên Şoreşger (TCŞ), Tevgera Jinên Kurdistanê ya Ewropayê (TJK-E) û Navenda Çanda Kurdistanê pêşengiya çalakiyê dikin.


Mijarên Din