NÛÇEYÊN LEZGÎN! Li Minbicê teqînek pêk hat

Berxwedana Leyla Guven di roja 181’yemîn de ye

Çalakiya Leyla Guven a greva birçîbûnê ya bi armanca rakirina tecrîda li ser Rêberê Gelê Kurd Abdullah Ocalan berdewam dike. Berxwedana Leyla Guven ket roja xwe ya 181’an. Her wiha çalakiya rojiya mirinê ya 15 girtiyan di roja 8’emîn de didome. Piştî peyama Ocalan ku parêzeran parve kir, çalakgeran diyar kir ku dê çalakiya xwe bidomînin.

Hevseroka Kongreya Civaka Demokratîk (KCD) û parlamentera HDP'ê ya Culemêrgê Leyla Guven bi armanca bidawîkirina tecrîda li ser Rêberê Gelê Kurd Abdullah Ocalan, di 8'ê Mijdara 2018'an de li Girtîgeha Amedê dest bi greva birçîbûnê ya bêdem û bêdorveger kir.

Leyla Guven piştî ku hate berdan, ev 181 roj e li mala xwe li ber xwe dide.

Girtî: Çalakiya me dê dewam bike

Piştî peyama Rêberê Gelê Kurd Abdullah Ocalan a ku duh parêzerên wî bi raya giştî re parve kir, girtiyan jî daxuyaniyek da û diyar kir tecrîd bi dawî nebûye, dê çalakiya xwe bidomînin. Di daxuyaniya girtiyan de wiha hate gotin:

“Beriya her tiştî divê em bibêjin ku em hevdîtina ku 2 parêzeran di 2’yê Gulanê de bi Ocalan kiriye, girîng e û bi nirx dibînin. Lê belê wateya hevdîtineke wiha, ne ew e ku tecrîd hatiye rakirin. A rast, hevdîtin di şert û mercên tecrîdê de hatiye kirin, em pêvajoya hevdîtinê bi vî awayî dibînin. Heta ku xwestekên ku me berê eşkere kiribûn, pêk neyên û temînata wan ji aliye Wezareta Edaletê ve neyê dayîn, dê berxwedana me berdewam bike. Divê bê zanîn ku di her şert û mercî de, heta tecrîd rabe dê berxwedana me bê tawîz berdewam bike.” 

Çalakiya Nasir Yagiz

Li Hewlêrê berxwedana endamê HDP'ê Nasir Yagiz jî ku bi heman armancê dest bi çalakiya greva birçîbûnê kir, di roja 168'emîn de dewam dike. Berxwedana li Strasbourgê ya 14 çalakgeran û li Walsê ya Îmam Şîş di roja 142'yemîn de didome.

Çalakiya girtiyên li girtîgehên Tirkiyeyê ku koma ewil 16'ê Kanûna 2018'an dabû destpêkirin, 143 roj e berdewam dike. Li Londonê Nahide Zengin û Mehmet Sait Yilmaz 55 roj e çalakiya xwe didomînin. Herêm Mehmûd, bi heman armancê li Kelarê ya Germiyanê 73 roj e di greva birçîbûnê de ye. Li Wargeha Penaberan a Şehîd Rûstem Cûdî (Mexmûr) greva birçîbûnê ya ku di 16’ê Kanûna 2018’an de li dijî tecrîda girankirî ya li ser Rêberê PKK’ê Abdullah Ocalan û ji bo piştgiriya pêşenga çalakiya greva birçîbûnê Leyla Guven dest pê kir, di roja 143'yan de berdewam dike. Endama Koordînasyona Meclisa Îştar Fadîle Tok jî di roja 108'an de bi biryardariyeke xurt çalakiya xwe berdewam dike.

Piştî 1'ê Adarê bi hezaran girtiyan li girtîgehên Tirkiyê dest bi greva birçîbûnê kir û çalakiya wan di roja 66'emîn de berdewam dike.

Çalakiya parlamenterên HDP'ê Dêrsim Dag a di 3'yê Adarê de dest pê kiribû û ya Tayîp Temel û Murat Sarisaç ên di 8'ê Adarê de dest pê kiribû, li avahiya HDP’ê ya Amedê berdewam dike.

Çalakgerên ku li girtîgehê dest bi grevê kir û piştre hatin berdan jî çalakiya xwe li malen xwe berdewam dikin. Çalakiya Sedat Akin ê li Êlihe 121 roj, Gurbet Ektîren a Dêrika Merdînê 112, Semra Alkan a li Alîaga ya Îzmîrê 121 roj, Îhsan Sinmiş ê li Kuçukçekmece ya Stenbolê 70 roj e çalakiya xwe li malê berdewam dikin.

Îsmet Yilmaz, Salîh Tekin, Sevican Yaşar, Bîlal Ozgezer li avahiya HDP'ê ya Amedê di 3'yê Adarê de dest bi greva birçîbûnê kiribû. Piştî çalakiyê hatin girtin û li girtîgehê çalakiya xwe berdewam kirin. Mehek şûnde dîsa hatin berdan û niha Îsmet Yildiz, Sevîcan Yaşar, Salîh Tekîn û Bîlal Ozgezer li malê çalakiya xwe berdewam dikin.

Rojiya mirinê didome

Rojiya mirinê ya 15 girtiyên li girtîgehên Bakirkoy a Stenbolê, Gebze ya Kocaelî, Wan û Amedê di roja 8'emîn de dewam dike. Navên 15 girtiyên di rojiya mirinê de wiha ne: Li Girtîgeha Jinan a Bakirkoyê; Nesrîn Akgul, Şukran Aydin, Zozan Çîçek. Li Girtîgeha Jinan a Gebzeyê; Ardil Çeşme, Asli Dogan. Li Girtîgeha Ewlehiya Bilind a Wanê; Ahmet Anigi, Ozhan Ceyhan, Vedat Ozagar, Îhsan Bulut, Erol Çelîk. Li Girtîgeha Tîpa D ya Amedê; Engîn Akhan, Enver Durmaz, Ahmet Topkaya, A. Haluk Kaplan û Ferhat Turgay.

Çalakiyên fedaî yên li dijî tecrîdê

Li bajarê Krefeld ê Almanya di 20'ê Sibatê de Ugur Şakar li dijî tecrîdê agir berda bedena xwe û di 22'yê Adarê de jiyana xwe ji dest da. Zulkuf Gezen (33) di 17'ê Adarê de li dijî tecrîdê li Girtîgeha Tîpa F-2 a Tekîrdagê, Ayten Beçet (24) di 23'yê Adarê de li Girtîgeha Gebzeyê, Zehra Saglam (23) di 24'ê Adarê de li Girtîgeha Tîpa T a Oltuyê, Medya Çinar (24) di 25'ê Adarê de li Girtîgeha Tîpa E ya Mêrdînê dawî li jiyana xwe anî. Yonca Akici di 29'ê Adarê de li Girtîgeha Jinan a Şakranê çalakî pêk anî û di 1'ê Nîsanê de jiyana xwe ji dest da. Siraç Yuksek, di 2'yê Nîsanê de li Girtîgeha Tîpa T-2 ya Osmaniyeyê, Mahsum Pamay jî di 5'ê Nîsane de li Girtîgeha Ewlehiya Bilind a Xarpêtê bi heman armancê dawî li jiyana xwe anî.


Mijarên Din