Beşa yekemîn a malbatên sûrî dê îro ji kampa Holê derkevin

35 malbatên sûrî amadekariyên derketina ji kampa Holê dikin ku dê berê xwe bidin bajarê Reqayê û gundewarên wê. Ev beşa yekemîn e ji kampê derdikeve û di çarçoveya pêkanîna biryara Rêveberiya Xweser de pêk tê.

Li gorî agahiyên ji kampa Holê  hatine bidestixistin, 35 malbatên sûrî ku ji 117 kesan pêk tên, li qadeke kampê ya nêzî deriyê têketinê yê sereke kom bûne û xwe ji bo derketinê amade dikin.

Li gorî berpirsên rêveberiya kampê, dê ev malbat di çend saetên pêş de ber bi bajarê Reqayê û gundewarên wê ve bi rê bikevin.

Berpirsan destnîşan kir ku kesên dê ji kampê derkevin, daxwaznameyên derketinê pêşkêşî nivîsgehên ku di çarçoveya biryara 146`an a Rêveberiya Xweser de têkildarî vê mijarê hatine vekirin, kirin.

Demeke berê, berpirsê Nivîsgeha Têkiliyan a Kampa Holê ji ajansa me re daxuyandibû ku rêveberiya kampê amadekariyên derxista malbatên sûrî dike û dê beşa yekemîn di vê hefteyê de derxe.

Rêveberiya Xweser di 10`ê Cotmehê de, têkildarî derxistina malbatên sûrî yên koçber ku dixwazin ji kampa Holê derkevin, biryarek derixistibû. Ev yek li gorî civîna ku 5`ê Cotmeha 2020`an di navbera  Rêveberiya Xweser, Meclisa Sûriya Demokratîk (MSD), Desteya Kar û Barên Civakî û Desteya Hundirîn de hatibû lidarixistin, pêk hat.

Malbatên sûrî yên li kampê li ser 2 beşan in; beşek dixwaze ji kampê derkeve, beşa mezin jî ji ber sedemên jiyanî û ewlehiyê naxwaze ji kampê derkeve.

Li gorî serjimariya herî dawî ya Rêveberiya Kampa Holê, li kampê 17 hezar û 693 malbatên ku ji 64 hezar û 373 kesan pêk tên, dimînin ku ji wan 6 hezar û 706 malbatên sûrî ne û ji 24 hezar û 223 kesan pêk tên.

(cx)

ANHA


Mijarên Din