Buroya Parastinê ya Rêveberiya Xweser: Divê êrişên rejîma Tirkiyê bên rawestin

Hevserokê Buroya Parastinê ya Rêveberiya Xweser a Bakur û Rojhilatê Sûriyê Asî Zîdan bang li dewletên endamên NATO`yê kir ku siyaseta dewleta Tirk a dagirker a li dijî gelên Bakur û Rojhilatê Sûriyê rawestînin.

Îro piştî civîna dewletên endamên NATO`yê ya li paytexta Brîtanyayê Londonê bi dawî bû, ajansa ANHA`yê hevdîtin bi hevserokê Buroya Parastinê ya Rêveberiya Xweser a Bakur û Rojhilatê Sûriyê Asî Zîdan re çêkir.

Asî Zîdan wiha axivî: “piraniya dewletên endamên NATO`yê di nava dewletên ku destekê didine têkoşînê li dijî terora navdewletî de ne û di serî de DAIŞ û Nusra ku li dijî gelên Sûriyê û herêmê hemû rêbazên terorê bi kar anîn, lê belê hîn jî em bi hêvî ne ku têkiliyên leşkerî ku şerê li dijî terora navdewletî dike armanc, berdewam bikin û hêj di vê derbarê de em hevkar in.

‘DIVÊ REJÎMA TIRKIYÊ WERE TENGAVKIRIN’

Asî Zîdan daxwaz ji dewletên endamên NATO`yê kir ku rejîma Tirkiyê asteng bikin û êrişên li dijî pêkhateyên li Bakur û Rojhilatê Sûriyê rawestînin. Gelên herêmê ku di oxira parastina yekitiya Sûriyê de zêdetirî 11 hezar şehîd û 22 hezar birîndar dane.

Her wiha banga derxistina çeteyên Artêşa Wetenî ya Sûriyê ji xaka Bakur û Rojhilatê Sûriyê kir û got divê rê li pêşiya guhartina demografiya bigirin.

‘LI BAKURÊ SÛRIYÊ DIVÊ KOMKUJIYÊN DEWLETA TIRK WERIN RAWESTANDIN’

Zîdan di dawiya axaftina xwe de bang li dewletên cîhanê û di serî de dewletên endamên NATO`yê kir ku komkujiyên artêşa Tirk ên li ser Bakur û Rojhilatê Sûriyê rawestînin, ji ber heta niha bûne sedema koçberkirina nîv milyon kesî.

(eh) 

ANHA


Mijarên Din