Cenazeyê şehîd Xwînrij Welat li Hesekê hate veşartin

Bi beşdarbûna bi sedan welatiyên bajar û gundewarên Hesekên cenazeyê şervanê YPG‘ê Sîpan Cafer (Xwînrij Welat) ê ji Efrînê li Goristana Şehîda Dijwar hate veşartin.

Bi sedan şêniyên bajar û gundewarên Hesekê cenazeyê şervanê YPG‘ê Sîpan Cafer (Xwînrij Welat) ê ku di 13’yê Nîsanê de li gundê Baxoz ê Dêrazorê di dema kar û barên paqijkirina herêmê de şehîd bû, ji ber navenda Meclisa Malbatên Şehîdan a Hesekê wergirtin û ber bi Goristana Şehîd Dijwar a li gundê Dawidiyê ve bi rê ketin.

Li goristana merasîm bi deqeya rêzgirtina leşkerî ji aliyê şervanên YPG û YPJ‘ê ve dest pê kir.

Piştre Meclisa Malbatên Şehîdan şehadeta şervanên QSD‘ê Ehmed El-Huseynî (Mêrxas) û Zekeriya El-Îsa (Jiyan Hesekê) eşkere kir.

Di merasîmê de, rêveberê Meclisa Malbatên Şehîdan Bengîn Badînî, ji fermandarên YPG‘ê Ezîz Hesekê û bi navê TEV-DEM‘ê Ferhan Dawid axivîn.

Kesên axivîn sersaxî ji malbatên şehîdan re xwestin û gotin, van şervanan ji bo pêkanîna jiyaneke azad û wekhev canê xwe feda kirin, ji bo dilsoziya bi wan re divê destkeftiyên ku bi saya wan hatin bidestxistin werin parastin.

Fermandarê QSD‘ê Ezîz Hesekê soza şopandina rêya şehîdan û pêkanîna armancên wan da.

Dayika şehîd Xwînrij, Gulîstan Efrînê jî axivî û got: "Dema Xwînrij şehîd ket, min soz da ku rûndikan nebarînim, ji ber ku me hêz ji fikr û felsefeya rêberê xwe Ocalan girtiye. Kesên lewaz digirîn, ji ber vê yekê em negirîn, em ê Efrînê rizgar bikin û di şahiyan de rûndikên kêfxweşiyê bibarînin."

Dayika şehîd her wiha got: "Dema em dibêjin şehîd namirin, tê wateya ku em xeta wan dişopînin, bila Erdoganê faşîst zanibe ku berxwedana lehengên wan têk naçe û bi dawî nabe. Şehîd Xwînrij ji min re digot em ê Efrîn rizgar bikin û lê vegerin. Ez soz didim ku têkoşînê dewam bikin heta Efrîn rizgar bibe û hêviyên şehîdan pêk werin."

Nasnameyên şehîdan hatin xwendin û radestî malbatên wan hatin kirin.

Paşê cenazeyê şehîd Xwînrij di nava dirûşme û tilîliyên dayikan hate veşartin.

ANHA


Mijarên Din