Dewleta dagirker di 2 mehan de 75 roket avêtin Efrîniyên li  Şehbayê

Artêşa dagirker a Tirk û çeteyên wê di mehên Tîrmeh û Tebaxê de topbaranên li dijî kantona Şehbayê ku şêniyên Efrînê neçar mane koçî bikin, zêde kirine. Di encamê de şêniyekî jiyana xwe ji dest da û 5 jî birîndar bûn û li rexê jî ziyanên madî gihiştin şêniyan. Dewleta dagirker di 2 mehan de 75 roket avêtine şêniyên Efrînê yên li Şehbayê.

Kantona Şehbayê ya ku bi deh hezaran şêniyên kantona Efrînê ji ber êrîşên dijminatiya Tirkiyê koçî wir bûne, bi awayekî rojane rastî kiryarên dagirkeriya Tirk û çeteyên wê yên li herêmên Ezaz, Marih û Efrînê bi cih bûne, tên.

Artêşa dagirker a Tirk û çeteyên wê gundên Şêx Îs, Hirbil, Samoqa, Bendava Şehba, Til Cîcan, Nêrebiyê, Til Medîq, Til Malid, Til Rifat û Um Hoş bi çekên giran, roketên hawin û topavêjê dike hedef.

Li gor serjimariya meclisên herêmê yên kantona Şehbayê, binpêkirinên dagirkeriya  Tirk û çeteyên wê ji destpêka meha Tîrmehê ve zêde bûne. Her wiha navçe û gund bi zêdetirî 75 roketên cur bi cur kirin hedef.

Ev binpêkirin bû sedema ziyanên  mirovî û madî. Di meha Tîrmehê de artêşa dagirker a Tirk û çeteyên ên ku li bajarê Ezazê bi cih bûne, navçeya Til Rifatê bi zêdetirî 7 roketan kirin hedef. Di encamê de şêniyê bi navê Sebrî Umer Hemdo ji şêniyê Til Rifatê ye şehîd bû û 5 jî ji şêniyên Efrînê jî birîndar bûn. Kesên birîndar bûne jî ev in; Mehrem Bekir Gilo, Îlyas Sebrî Hemdo, Osman Reşîd Mixtar, File Abdullah Xalid û Nûrî Xelîl Hemo.

Di Tebaxê de dîsa topbaranên  dagirkeriya Tirk ên li ser navçeya bi zêdetirî 8 roketan berdewam kir û di encamê de tenê ziyanên madî çêbûn.

Li herêmên Şêx Îs, Hirbil, Samoqa, Bendava Şehba, Til Cîcan, Nêrebiyê, Til Medîq û navçeya Um Hoş jî ziyan tenê madî bûn.

Di vê çarçoveyê de hevserokê navçeya Til Rifatê Mihemed Henan got: "Piştî ku şêniyên Efrînê neçar man ji ber dagirkeriya Tirk û çeteyên wê ji warê xwe derkevin û berê xwe bidin Şehbayê, li vir jî binpêkirinên dagirkeran li dijî wan berdewam in. Armanca van êrîşan şikandina vîna şêniyan e.” Henan domand: "Dagirkerî rojane êrîşî dike û dibe sedema ziyanên mirovî. Ji ber êrîşan jî dest û pêyên şêniyan qut dibin. Armanca dewleta dagirker a Tirk û çeteyên wê ji van binpêkirinan ew ku vîna şêniyên Efrînê lawaz bike û komkujiyan li ser wan pêk bîne.”

Şêniyê bi navê Fexrî Ehmed ê ji navçeya Cindirêsê ya Efrînê ye û niha li navçeya Til Rifetê bi cih bûye wiha got: “Mafê me tê binpêkirin û cîhan bêdeg e. Lê belê em şêniyên Efrînê dê li hember armancên dewleta dagirker a Tirk û çeteyên wê bisekinin. Em ê bendan li heber projeyên Tirkiyê yên dagirkeriyê danin.”

(fr/bm)

ANHA


Mijarên Din