Dewreya Erka Xweparastinê ya Reqayê bi dawî bû

Li Akademiya Şehîd Ehmed El-Elî ya girêdayî Hêzên Erka Xweparastinê ya li bajarê Reqayê, dewreya duyemîn bi beşdariya 750 ciwanan ji bajar û gundewarên Reqayê, bi merasîmekê bi dawî bû.

Bi armanca xurtkirinsa sîstema parastinê li bajarê Reqayê, dewreya duyemîn a Hêzên Erka Xweparastinê ya Reqayê piştî 45 rojan ji perwerdeyên leşkerî û bîrdozî, bi dawî bû.

Di merasîma bidawîkirina dewreyê de, gelek kesayetên leşkerî yên Hêzên Erka Xweparastinê yên Reqayê, fermandarên QSD’ê, endamên meclisên herêmî, di serî de Meclisa Sivîl a Reqayê, Komîteya Malbatên Şehîdan û xizm û malbatên şervanên Erka Xweparastinê amade bûn.

Dewre bi toraneke leşkerî ji aliyê şervanên ku dewreya xwe bi dawî kirin, dest pê kir. Piştre cîgirê Hevserokatiya Rêveberiya Xweser a Bakur û Rojhilatê Sûriyê  Hemdan El-Ebd û fermandarê Tûgayên Leşkerî yên Bakur û Rojhilatê Sûriyê Hemîd Dêrik axivîn.

Hemdan El-Ebd got: “Em vê dewreyê li gelê Reqayê pîroz dikin. Her wiha em spasiya Rêber Abdullah Ocalan dikin ku bi fikr û felsefeya wî herêmên Bakurê Sûriyê ku gelek êş û azar ji şer dîtin, rizgar bûn.”

El-Ebd wiha dewam kir: “Hêzên Sûriya Demokratîk (QSD) îro hêza herî xurt li ser axa Bakur û Rojhilatê Sûriyê ye. Vê hêzê bi hezaran şehîd dan û mezintirîn rêxistina terorîst di dîroka mirovahiyê de têk bir.”

Ehmed El-Elî ji şêniyên bajarê Reqayê ye û di Hemleya Xezaba Firatê ya Rizgarkirina Reqayê ya sala 2017`an de şehîd bûbû.

(kc)

ANHA


Mijarên Din