Di merasîma şehîdan de, pêkhateyên Tirbespiyê soza berdewamkirina berxwedanê da

Pêkhateyên navçeya Tirbespiyê di merasîma 8 şehîdên Berxwedana Rûmetê de, soza berdewamkirina berxwedanê ya li dijî êrişên dewleta Tirk a dagirker da.

Meclisa Malbatên Şehîdan a navçeya Tirbespiyê merasîma îlankirina 8 şervanên Hêzên Suriye Demokratîk(QSD) ên li Serêkaniyê di Berxwedana  Rûmetê de şehîd bûbûn, li dar xist.

 Navên şehîdan wiha ne: Mûsa Cûma (Botan Tirbespiyê), Xalid Izo (Xebat Tirbespiyê), Ehmed Osman (Rêwan Tirbespiyê), Raêd El-Nedas (Bêkes Qendîl), Dilo Silêman (Mazlûm Xeznê), Mahir Mihemed (Baz Iwêne), Usama El-Henzal (Idrîs Tirbespiyê) û Raêd El-Wero (Rodî Um Izam).

 Merasîm di konê li pêşiya Navenda Kongreya Star a li rojhilatê navçeyê hatibû vegirtin de, li dar ket û bi hezaran pêkhateyên nevçeyê beşdar bûn.

Merasîmê bi deqeyeke rêzgirtin dest pê kir. Piştre li ser navê Rêveberiya Xweser a Demokratîk Hevserokê Meclisa Kantona Qamişlo Îfram Ishaq, li ser navê Meclîsa Suriye Demokratîk(MSD) Hikmet Hebîb, li ser navê Partiya Yekîtiya Demokratîk(PYD) hevseroka partiyê  Eyşe Hiso û li ser navê Partiya Demokratî ya Kurdistanê El-Partî sekertêrê partiyê Ebid El-kerîm Siko, axivîn.

Axêveran piştrast kir ku dewleta Tirk a dagirker di êrişên xwe de ferqê naxe navbera pêkhateyan. Lê belê qirkirina gelên resen ên herêmê û guhertina demografîk dike armanc. Ev yek di topbaranên li dijî bajarê Qamişlo de û destpêkê hedefgirtina taxên ku gelê Suryanî lê jiyan dike, diyar bû.

Axêveran gotin ku piştgirya hemî pêkhateyan ji şervanên QSD`ê re hişt ku projeya demokratîk li Bakur û Rojhilatê Sûriyê bibe xala sereke di çareseriya aşîtyane li Suriyê de. Her wiha jî berdelên ku gelên herêmê dane, bûn sembola azadiyê û jiyana hevbeş di nav pêkhateyên herêmê de. Axaftvanan soza berdewamkirina berxwedanê heta serkeftinê û têkbirina planên dagirkeriyê, da.

Piştre wesîqetên şehîdan hatin xwendin û radestî malbatên wan hatin kirin. Merasîm bi tilîlî û diruşmeyan bi dawî bû.

ANHA


Mijarên Din