‘Divê hikumeta Başûr û Iraqê helwestên xwe zelal bikin‘

Endamê Partiya Yekîtiya Demokartîk a Kurd li Sûriyê (Yekîtî) û berpirsê rêxistina partiyê li Serêkaniyê Idrîs Îso bang li hikumeta Başûrê Kurdistanê û Iraqê kir û got: “Helwesta xwe ya li dijî êrîşên Tirkiyê yên li ser xaka Başûrê Kurdistanê zelal bikin.”

Êrîşên dagirkeriya Tirkiyê yên li ser herêmên Başûrê Kurdistanê, ku sivîlan dike hedefa xwe bilindtir bûne. Hikumeta Başûrê Kurdistanê, Iraq û civaka navneteweyî bêdeng e, her wiha gelên herêmê û gelê Kurd li herçar parçeyên Kurdistanê ji van êrîşan bi gazin in.

Derbarê mijarê de, endamê Partiya Yekîtiya Demokratîk Kurd li Sûriyê (Yekitî) û berpirsê rêxistina partiyê li herêmê Idrîs Îso ji ANHA`yê re axivî.

Îso wiha got: "Gelek armancên dagirkeriya Tirkiyê ji van êrîşan hene. A girîng  şikandina îradeya gelên herêmê û dagirkirina destekftiyên ku bi saya şehîdan li Başûrê Kurdistanê bidestxistine, ye. Her wiha hebûna Kurd û destkefiyên Kurdan ên li her derê dike armanca xwe. Mînaka herî dawî jî destkeftiyên ku herî dawî li herêmên Bakur û Rojhilatê Sûriyê pêk hatin, e."

Îso diyar kir ku dagirkeriya Tirkiyê her wiha armanc dike ku "Mîsaqa Millî" pêk bîne û gotinên xwe wiha domand: “Ev yek bi rêya daxuyaniya yek ji berpirsên hikumeta AKP`ê hate zelalkirin. Berpirsê AKP’ê daxuyand ku gelek herêmên Bakurê Sûriyê mîna parêzgeha Heleb, Reqa û herêma Cizîrê heta parêzgeha Mûsilê li Iraqê, ew xaka Tirkiyê ye."

Îso bêdengiya Başûrê Kurdistanê û Iraqê ya li dijî êrîşên Tirkiyê yên li ser herêmê şermezar kir.

Îso wiha got: "Tirkiye rastî aloziyeke mezin a aborî tê. Dewleta Tikriyê hewl dide bi rêya hedefgirtina gelê Kurd pirgirêkên xwe yên hundirîn derxe derve."

Idrîs Îso bang li hikumeta Iraqê û hikumeta Başûrê Kurdistanê kir ku bi hemû rêyan, leşkerî, siyasî û diblomasî êrîşan bidin rawestandin.

(jo/bm)

 ANHA


Mijarên Din