Du malbat piştî nakokiya zêdetirî 45 salan li hev hatin

Komîteya Lihevkirin û Edaleta Civakî ya Meclisa bajarê Serêkaniyê du malbatên ku zêdetirî 45 salan nakok bûn li hev anîn.

Sedema nakokiya di navbera her du malbatan de vedigere  doza tolhildanê ya ji ber kuştina du kesan ji malbatên Şêxo Meimo ya ji êla El-Berkhan a ji pêkhateya Kurd û Ehmed Îsa El-Celo ya ji êla El-Tay a ji pêkhateya Ereb ên ji şêniyên bajarê Serêkaniyê. Nakokî 45 salan berdewam kir.

Bi armanca çareserkirina dozê Komîteya Lihevanînê û Edaleta Civakî ya Meclisa Serêkaniyê ya kantona Hesekê mudexele kir û her du alî li hev anîn.

Merasîmê  lihevanînê li navenda meclisa navçeya Serêkaniyê li dar ket. Endamên saziyên sivîl ên bajêr û rûspiyên êlên Kurd û Ereb ên herêmê tevî endamên her du êlên nakok amade bûn.

Lihevanînê bi deqeyek rêzgirtin destpê kir. Piştre hevserokê meclisa navçeya Serêkaniyê Ferec Qido, endama rêveber a Komîteya Lihevanînê ya herêma Serêkaniyê Aytan Mele Derwîş û endamê rêveber ê Komîteya Lihevanînê ya Herêma Cizîrê Nûredîn Şakir axivîn

Kesên axivîn bidawîkirina nakokiya herdu malbatan pîroz kir û spasiya her du malbatên ku li hev hatine.

Axêveran bang li tevahî pêkhateyên herêmê kirin ku nakokiyên xwe bidin aliyekî û destnîşan kirin ku di vê qonaxa nazik de pêwîst bi hevgirtin û yekitiyê heye.

Ji hêlên malbata Şêxo Mixtar Husên û malbata El-Tey jî Elî Mihemed axivîn û spasiya keda Komîteya Lihevanîn û Edaleta Civakî ya lidarxistina rûniştina lihevanînê û bidawîkirina nakokiya di navbera herduyan de, kir. Her du malbatan soza dilpakî, jinûvevejandina rihê biratiyê, bexşandina endamên her du malbatan û qedexekirina dubarekirina van şaştiyan, da.

Piştî axaftin bi dawî bûn, belgeya peymana lihevanînê ji hêla endamê Komîteya Lihevanînê ya kantoan Hesekê Xalid Husên ve hat xwendin ku tekeziya li ser lihevanîna di navbera her du malbatan de ye. Dûvre her du malbatn li ser belgeya peymana lihevanîn, îmze kir.

Dûvre endamên her du malbatan li gor kevneşopiyên civakî ya nîşaneya lihevanînê ye di nava çepikên beşdaran de, silav dan hev.

(fr)

ANHA


Mijarên Din