DYA`yê cezayên nû û berfireh li dijî hikumeta Esed û piştevanên wî ferz kir

DYA`yê çarşemê ragihand ku cezayên nû li dijî hikumeta Sûriyê û piştevanên wê ferz kirine. Her du wezaretên derve û diravî der barê vê gavê de du daxuyaniyên cuda parve kirin. Ev beşê duyemîn ê tedbîrên di çarçoveya qanûna Qeyserê hatine girtin de ye, ku ji bo parastina sivîlên Sûriyê meha borî ketibû meriyetê.

Wezîrê karê derve yê DYA’yê Mike Pompeo bi daxuyaniyekê ragihand ku koma nû ya cezayan bi navê "cezayên Hema û Merat Nûman" e û destnîşan kir ku ev gav ji bo bîranîna du bûyerên xerab ên bi destê rejîma Esed ku wekî vê hefteyê di salên 2011`an û 2019`an de pêk hatine.

Di lîsteya hatiye diyarkirin de 14 cezayên nû hatine ferzkirin. Pompeo ragihand ku ceza li dijî kurê mezin ê Beşar Esed Hafiz Esed, Zuhêr Tewfîq Esed û kurê wî, Kerem Esed û furqeya yekê ya hêzên hikumetê, hatine ferzkirin.

Mike Pompeo wiha got: "Beriya 9 salan, hêzên Beşar Esed bajarê Hemayê dorpêç kir û bi dehan xwepêşandêrên sivîl kuştin. Beriya salekê jî, rejîma Esed û hevalbendên wê sûkeke qerebalix li Merat Nûman topbaran kirin û 42 welatiyên Sûriyê yên bê guneh kuştin."

 Pompeo daxuyand ku: "Divê têkildarî qurbaniyên Hema û Merat Nûman û  sûcên şer ên din ên dermirovî ku rejîma Esed pêk tîne, lêpirsîn û adalet hebe. Li pêşiya rejîma Esed û alîgirên wî du berbijark hene; yan dê gavên ji bo çareseriya siyasî ya şerê Sûriyê li gorî biryara Meclisa Ewlehiyê hejmar 2254`an bavêje, yan dê rastî lîsteyên nû yên cezayan bê û dê têk biçe."

Wezîrê Amerîkî di daxuyaniyê de soz da ku dê her tim rejîma Esed ji sûcên ku pêk aniye, berpirsyar nîşan bidin û got: "Artêşa rejîma Esed bûye sembola hovîtî, çewisandin û gendeliyê. Bi hezaran sivîl kuşt û xwepêşandêrên bê çek bin çav kir û êşkence kir. Her wiha dibistan, nexweşxane û sûk rûxandin."

Wezareta Diravî jî di daxuyaniya xwe de ragihand ku nivîsgeha çavdêriya esilên biyanî (Ofac) ya girêdayî wê, navê karsazekî û 9 aliyên din xistiye lîsteya cezayan, ji ber ku bi rêya lêkirina avahiyan piştgirî dane hikumeta Sûriyê.

Wezaretê piştrast kir ku ev gav di çarçoveya berdewamkirina zextên li dijî şerîket û kesên ku piştgiriya çalakiya ji nûvelêkirinê ya rejîma Esed dikin, pêk hatiye.

Di daxuyaniyê de hate destnîşankirin: "Wezareta Diravî 10 armanc xist lîsteya cezayan, ku 4 li gorî qanûna Qeyser û biryara hejmar 13582, ji ber destekdayîna hikumeta Sûriyê ne û 6 yên mayî jî tenê li gorî biryara hejmar 13582 ne."

Wezareta Diravî ya Amerîkayê tekez kir ku dê zexta li dijî kes û şerîketên destekê didin çalakiya ji nûveavakirinê ya rejîma Esed, berdewam bike.

Wezratê daxuyand ku hemwextî cezayên wezareta derve ya Amerîkayê, wê 4 kes li gorî madeya duyem a biryara hejmar 13582`an ku girêdayî kesên agirbestê asteng dikine, xistiye lîsteya cezayan.

Ji kesên ku ceza li wan hatine ferzkirin karsazê Sûriyê Wesîm Enwer El-Qetan e.

Wezaretê ragihand ku têkiliya El-Qetan bi kesayetên bi hêz ên rejîma Esed re hene, lewra hikumeta Sûriyê hemû projeyn lêkirinê yên mezin ên derveyî bajarê Marote yê Şamê, dan El-Qetan.

 


Mijarên Din