Femandarekî QSD’ê: Bi êrişeke sêalî xwestin Eyn Îsayê dagir bikin, êriş hatin şikandin

Yek ji fermandarên QSD’ê yê navçeya Eyn Îsayê Ezîz Xerbîsan, êrîşên li dijî navçeyê pêk hatine nirxand û got: “Hêza me pêşî li komkujiyeke mezin girt. Hewldan û amadekariya dagirkeran heye ku navçeyê yekser dagir bikin. Em li dijî van hewldanan 24 saetan hişyar in.”

21`ê Cotmehê komeke çete û leşkerên dewleta Tirk a dagirker hewl dan navçeya Eyn Îsayê dagir bikin. Di encama bersivdayîna şervanên Meclisa Leşkerî ya Eyn Îsayê de hewldan hate pûçkirin. Piştî şerê 3 saetan, çete û leşkerên dewleta Tirk çekên xwe hiştin û reviyan li aliyê din balafirên keşfê û yên şer li ser asîmanê navçeya Eyn Îsa û gundewarê wê geriyan.

Têkildarî mijarê, yek ji fermandarên QSD’ê yê navçeya Eyn Îsayê Ezîz Xerbîsan ji ANHA`yê re axivî.

JI 3 ALIYAN VE ÊRIŞ KIRIN Û ÊRIŞA WAN HAT ŞIKANDIN

Ji fermandarên QSD`ê Ezîz Xerbîsan bal kişand ser armanca dagirkeran û got: “Artêşa Tirk a dagirker ji aliyê gundê Seyda yê ku dikeve bakur û rojhilatê Eyn Îsa ve û ji aliyê rêya M4`ê û aliyê kampa li rojavayê Girê Spî ve, hewl da derbasî navçeyê bibe. Zêdetirî 50 çete û leşkerên artêşa Tirk a dagirker ji 3 aliyan ve xwestin derbasî navçeyê bibin û li ser şêniyên navçeyê û gundewarê wê komkujiyekê pêk bînin. Lê belê hewldana wan hate têkbirin. Ev ne cara yekê ye ku dagirker dixwazin derbasî navçeyê bibin û dagir bikin, lê belê rastî bersivdayîna şervanên me tên.”

‘RÛSYA Û HIKÛMETA ŞAMÊ DÎSA BÊDENG MAN’

Ezîz Xerbîsan destnîşan kir ku di êrişan de leşkerên hikûmeta Şamê û Rûsya tu helwest nîşan nedan û wiha dewam kir: “Ev êriş li ber çavên van hêzan pêk hat. Di encama êrişan de mal û milkên sivîlan jî hatin hedefgirtin. Li rêya M4`ê ya di navbera navçeya Çelebiyê û Eyn Îsayê de ku sivîl tê re derbas dibin, êriş pêk tên.  Erebeyên li ser vê rê diçin û tên, rastî siûqest û topbaranê tên.”

HEWL DIDIN BAREGEHÊN XWE ZÊDE BIKIN’

Xerbîsan anî ziman ku dagirker di xeta gundewarê Eyn Îsayê û gundewarê rojavayê Girê Spî amadekariya şerekî mezin dikin û got: “Çeper û binerdan çê dikin û sewqiyatên leşkerî hene. Bi vê yekê dixwazin barergeh û nuqteyên xwe zêde bikin. Li gundê Seyda mewziyên xwe çêdikin û hewl didin li gund baregehekê ava bikin.”

’24 SAETAN HIŞYAR IN’

Fermandarê QSD`ê Ezîz Xerbîsan diyar kir ku çi dibe bila bibe, dê heta dawiyê bersiva dagirkeran bidin û axa xwe biparêzin û wiha lê zêde kir: “Em nahêlin ku navçeya Eyn Îsayê dagir bikin û zirarê bidin gelê me. Ev parastina rewa ye. Em jî 24 saetan hişyar in. Ew nikarin bihostekê jî derbasî xaka Eyn Îsayê bibin.”

ANHA


Mijarên Din