‘Feraseta AKP’ê rê li ber bûyerên destavêtinê vedike’

KJK’ê der barê bûyera destavêtinê ya li navçeya Kuçukçekmece ya Stenbolê de daxuyinek da. KJK’ê bûyer bi tundî şermezar kir û diyar kir ku feraseta desthilata AKP’ê ya faşîst rê li ber bûyerên bi vî rengî vedike.

Koordînasyona KJK'ê li ser hovîtiya li navçeya Kuçukçekmece ya Stenbolê ya di 23'yê Nîsanê de ku du kesan destdirêjî li keçeke 5 salî kir, daxuyaniyeke nivîskî weşand.

Koordînasyona KJK'ê bi bîr xist ku 23'yê Nîsanê li navçeya Kuçukçekmece ya Stenbolê 2 kesan dest avêt keçeke 5 salî û vê bûyerê di nava şêniyên Kuçukçekmeceyê û gelemperiya Tirkiyê de rê li ber hêrseke mezin vekir.

KJK'ê bal kişand ser meşên protestoyî û diyar kir ku hêzên ewlekariyê yên hikumeta faşîst a AKP-MHP'ê êrîş bir ser kesên çalakiya protestoyî dikir û xwepêşandanên protestoyî jî wek provokasyonê bi nav kir.

Di daxuyaniyê de wiha hate gotin: "Desthilatdariya faşîst a AKP-MHP'ê careke din karakterê xwe yê mêrê serwer ê qirêj ku piştgiriyê dide destavêtin, destdirêjî û kuştina jinan, nîşan daye."

Koordînasyona KJK'ê ragihand ku di dema desthilatdariya AKP'ê de bûyerên kuştin û destavêtina li jinan her zêde dibe û diyar kir, "AKP'ê ji bo desthilatdariya xwe bidomîne polîtîkayên dijminatiya li jinê mayinde kiriye. Bûyera destavêtina li keça 5 salî ya li Kuçukçekmeceyê xwedî gelek armancên siyasî û civakî ye."

KJK'ê destnîşan kir ku bûyera li Stenbolê rû da plankirî ye û da xuyakirin, "Niha jî penaberekî ji Pakîstanê weke kiryarê vê bûyerê nîşan didin. Ku ev yek jî ji bo sorkirina hêrs û nefreta li dijî penaberan tê kirin. Lewma ev bûyer ji aliyê kê ve hatibe kirin jî li pişt wê dest û mejiyê desthilatdariya faşîst a AKP-MHP'ê heye."

KJK'ê bal kişand ser cih û dema bûyerê û diyar kir, "Bûyer li Stenbolê, 23'ê Nîsanê li taxên ku Kurd-Tirk û gelên din bi hev re dijîn, qewimî.

'Ne cara yekê ye ku bûyerên bi vî rengî diqewimin'

Di serî de tevgerên azadiyê yên jinan ên li Tirkiyeyê, divê parêzvanên mafên jinan, femînîst, hêzên demokrasî û azadiyê hemû zanibin; ne cara yekê ye ku bûyerên bi vî rengî diqewimin û ne ji rêzê ne. Bi rêya bûyerên bi vî rengî tê xwestin, di serî de jin, civak û hêzên demokrasiyê bên tepisandin û radestgirtin.

Hikumeta AKP-MHP'ê ya faşîst, ji roja ku bûye desthilatdar û vir ve bi polîtîkayên dijminatiya li azadiyê, civakê, jin û zarokan tevdigere. Lê belê salên dawî bûyerên tundî, destavêtin û destdirêjiya li jin û zarokan zêde bûne. Zêdebûna van bûyeran encameke polîtîkayên faşîzm, şer, aborî û civakî yên desthilatdariyê ye."

'Ne tenê pirsgirêka jinan e'

KJK'ê diyar kir, bûyera hovane ya li Kuçukçekmeceyê qewimî û bûyerên gengaz ên biqewimin, ne tenê pirsgirêka jinan e û ragihand, "Pirsgirêka hêzên civakî hemûyan e. Ji ber vê yekê pêwîstî bi têkoşîneke hevpar a hêzên azadiya civakî heye. Jin û hêzên azadiyê yên li Stenbolê û gelemperiya Tirkiyeyê, divê li dijî vê tifaqa mêr a faşîst bi rêxistiniyeke xurt tevbigerin."

'Heta ku AKP li desthilatê be ewlehî ji bo civakê tune ye'

Koordînasyona KJK'ê bi berdewamî diyar kir yek ji armanca desthilata faşîst a AKP-MHP'ê ew e ku hêzên demokrasiyê ji hev dûr bixîne, nehêle ku bigihijin hev û hilbijartina 31'ê Adarê nîşan daye heke jin, hêzên dilxwazên azadî, heq û dadê werin gel hev ti hêz nikare xwe li bara wan bigire. KJK'ê got, ''Divê were zanîn heta ku AKP li desthilatê be ti ewlehiya civakê tine. Heke li dijî vê pirnisandin, çavtirsandinê heke hêz bersivê nedin AKP wê zêdetir êrîşkar bibe. Bila ti kesek nekeve wê fikrê ku bi bêdengiyê, bi rengê ku xwe bidin anîşkan wê encamê bistînin. AKP ti caran wê dev ji armanca sazûmanîkrina vê pergala heramiyan neke ku her gav bi gav wê polîtîkayên xwe yên êrîşê zêdetir bike, civakê pûç bike, tecawizî zarokan bike, zengînanan zengîntir û hejaran hejarrtir bike. Her demê wê li benda keysa xwe be, dema ku delîve bi dest ket wê êrîşê bi ser hêzên dilxwazên azadiyê de bibe. Ji bo vê jî divê berxwedan domdar û mayinde be.''

KJK'ê bi domdarî got divê baş were fêhmkirin bi partîya herî hov, rêxistinî ya faşîst a dîroka Tirkiyê re hevrû ne û ji bo vê jî bi zanîna ku li Tirkiyê rewşeke derasayî ya pêvajoya faşîst tê jiyîn, li gel vê divê berxwedan were geşkirin û got, ''An na civaka Tirkiyê, hêzên demokrasî û azadiyê wê têkçûneke mezin bijîn.''

'Divê berxwedan domdar be'

Dil hilbijartinên 31'ê Adarê de tifaqa hêzên demokrasî û azadiyê têkçûneke mezin bi desthilata faşîst a AKP-MHP'ê dane jiyîn. Lê ev gavên destpêkê yên têkoşînê ne.

Heke ev xet were domdarkirin û mayindekirin wê serketin were mîsogerkirin. Bi vê çarçoweyê, gelên Tirkiyeyyê, jin, hêzên demokrasî û azadiyê her ku li dijî faşîzmê bûn xwedî helwest û li ber xwe dan û ev domdar û mayinde kirin, wê rûyê wan bikaribe bikene. Berxwedan divê domdar be. Ji niha ve jî bi girîngiyeke jiyanî ye ku hêzên demokrasî û azadiyê li bara bûyerên li Tirkiyeyê divê bi hev re û rêxistinî tevbigerin. Divê ti kes bi paş ve gavê neavêje. Heke ev were kirin wê dahatûya ronak a Tirkiyê were xilaskirin. Zarok, jin bi vê çarçoveyê dikarin werin parastin.”


Mijarên Din