Gelên Şehbayê li dijî tecrîdê meşiyan

Îro bi hezaran şêniyên kantona Efrîn û Şehbayê li gundê Babinis ê navçeya Fafînê ya kantona Şehbayê daketin qadan û tecrîda li ser rêber Abdullah Ocalan şermezar kir. Şêniyan soza berdewamkirina têkoşîna rakirina tecrîdê da.

Bi armanca şermezarkirina tecrîda li dijî rêber Abdullah Ocalan îro bi hezaran şêniyên kantonên Efrîn û Şehbayê li yarîgeha gundê Babinisê meşek li dar xist.

Xwepêşandêran wêneyên rêber Abdullah Ocalan û pankartên "Rêber Ocalan silav dikin, soza bilindkirina asta têkoşînê didin”, “Soz em ê girtîgeha Îmraliyê birûxînin” û “Bi Rêbertî re azad bijîn, kompoloya navdewletî ya li dijî rêber Ocalan komploya li dijî vîna gelên azadîxwaz û aştîxwaz e" rakirin.

Piştî meşê mîtîngek li dar ket û li ser navê Meclisa Kantona Şehbayê endamê rêveberiyê Ridwan Rifaî axivî û tecrîda li dijî rêber Ocalan şermezar kir. Ridwan Rifaî bang li şêniyên herêmên Bakur û Rojhilatê Sûriyê û Kurdistanê kir ku li dijî siyastên dewleta Tirk serî hildin. Rifaî bal kişand ser çalakiyên girseyî yên gel û got: "Ji ber bertekên gel dewleta Tirk hişt malbat û parêzerên rêber Ocalan pê re bicivin."

Paşê li ser navê Kongreya Star endama rêveberiyê Hêvî Silêman piştrast kir ku divê ew li ser bingeha fikr û felsefeya rêber Abdullah Ocalan bimeşin.

Mîtîng bi sloganên "Bijî Rêbertî” û “Azadî ji rêber Ocalan re" bi dawî bû.

(eh)

ANHA


Mijarên Din