Hozan Mizgîn li Qamişlo hate bibîranîn

Hozan Mizgîn "Gurbet Aydin" a ku di 11’ê Gulana 1992’an de di têkoşîna azadiyê ya Kurdistanê de şehîd bûye bi merasîmekê li navenda Çand û Hunerê ya Mihemed Şêxo ya bajarê Qamişlo hate bîranîn.

Tevgera Çand û Hunerê ya herêma Cizîrê bi wesîleya salvegera 27‘an a şehadeta hozan Mizgîn (Gurbet Aydin) a ku di 11’ê Gulana 1992’an de di têkoşîna azadiyê ya Kurdistanê de şehîd bûye merasîmeke li navenda Çand û Hunerê ya Mihemed Şêxo ya bajarê Qamişlo lidar xist. Bi dehan rewşenbîr, şêniyên bajarê Qamişlo û hunermend beşdarî merasîmê bûn.

Cihê merasîmê bi wêneyê şehîd Mizgîn, şehîdên meha Gulanê û wêneyên Rêberê Gelê Kurd Abdullah Ocalan hatibû xemilandin.

Merasîm bi deqeya rêzgirtin destpê kir. Paşê rêveberê Meclisa Malbatên Şehîdan Mahsûm Hesen û bi navê Tevgera Kevana Zêrîn Bêrî Dêrsim axivin.

Di axaftinan de hate gotin: "Di kesayeta hozan Mizgîn de em hemû şehîdên tevgera rizgariya Kurdistanê û şoreşa Rojava bi bîr tînin. Dengê şehîd Mizgîn wê hertim zindî be. Şehîd Mizgîn dengê xwe da Kurdistanê û bû sembola şoreşa Kurd."

Piştî axaftinan, Koma Stêra Zêrîn, Kîkan û Girbawî stranên hunermend Mizgîn gotin. Koma Hêvî Yekta şanoyek bi navê "Mirin û Jiyan" pêşkêş kir. Her wiha hunermend Elî Mensûr stranên folklorî û helbestvan Ferhadê Merdê helbest gotin.

ANHA


Mijarên Din