​​​​​​​HPG`ê nasnameyên 3 şehîdan eşkere kirin

HPG'ê nasnameyên 3 gerîlayên ku di 25'ê Hezîrana 2019'an de di êrişa hewayî ya artêşa Tirk de şehîd bûne, eşkere kirin.

Navenda Ragihandin û Çapemeniyê ya HPG'ê bi daxuyaniyekê nasnameyên 3 gerîlayên ku di encama êrişa hewayî ya artêşa Tirk li ser Metînayê de şehîd bûne, eşkere kirin.

Daxuyanî wiha ye:

"25`ê Hezîrana 2019'an di encama êrişa hewayî ya artêşa TC a dagirker de li herêma Metîna ya Herêmên Parastinê yên Medyayê hevrêyên me Rûmet, Simko û Şiyar şehîd bûn. Agahiyên li ser nasnameya hevrêyên me yên leheng ên şehîd bûn wiha ne:

Nasnav: Rûmet Ezda
Nav û paşnav: Abdullah Araz
Cihê jidayikbûnê: Mûş
Navê dayikê: Kamîle
Navê bav: Marûf
Cih û dîroka şehadetê: 25'ê Hezîrana 2019'an / Metîna

Nasnav: Simko Faraşîn
Nav û paşnav: Atîlla Ozdenç
Cihê jidayikbûnê: Wan
Navê dayikê: Kadriye
Navê bav: Giyasettîn
Cih û dîroka şehadetê: 25'ê Hezîrana 2019'an / Metîna

Nasnav: Şiyar Mamo
Nav û paşnav: Cemal Mamo
Cihê jidayikbûnê: Efrîn
Navê dayikê: Fatma
Navê bav: Welît
Cih û dîroka şehadetê: 25'ê Hezîrana 2019'an / Metîna

Tevgera Azadiyê ya Kurdistanê li ser bingeha têkoşîna bênavber a milîtanên fedayî-leheng û nirxên wan, niha di serdema herî nêzî azadiya gelê me de ye. Dewleta TC a mêtinger-dagirker ku nikare xwe li vê rabigire, ji bo her tiştên bi navê Kurdîtiyê ji holê rabike û komkujiyan bike, êrişan dike. Gelê Kurdistanê li dijî van êrişan bi rengekî yekgirtî bi awayekî dîrokî li ber xwe dide. Di vê pêvajoya berxwedanê de, ciwanên ku li pêşberî komkujî, zilm û êşkenceya dewleta TC a faşîst-mêtinger a li dijî gelê me bêdeng namînin û dixwazin bibin xwedî berxwedaneke bi rûmet, berê xwe didin nava refên gerîla û tevlî nava Tevgera Azadiyê ya Kurdistanê dibin.

RÛMET EZDA (ABDULLAH ARAZ)

Hevrêyê me Rûmet Ezda (Abdullah Araz) ku di sala 1999'an de li nava malbateke welatparêz a Mûşê ji dayik bû, zû têkoşîna azadiyê nas kir.  Di demekê de ku dagirkeran bi destê DAÎŞ'ê li Kobanê, li Şengalê komkujî û dagirkerî dikirin û hewl dan gelê Kurd qir bikin, ji bo parastina gelê Kurdistanê tevlî nava refên gerîlayên azadiya Kurdistanê bû. Ji roja ku tevlî nava gerîla bû û pê ve bi wêrekî, fedakarî di nava hevalên xwe de bû mînak. Welatparêzî û kevneşopiya şervanî ya serhedê di nava refên PKK'ê de bi tecrûbeya wergirtî kir yek û di demeke kurt de gelekî bi pêş ket. Hevrêyê me Rûmet ku rastiya dijmin ji nêz ve nas dikir, bi kesayetiya xwe ya sade, dilnizm û kedkar her tim bûn xwedî sekneke milîtanî ya hêjayî Rêber Apo, şehîdên şoreşê û gelê Kurdistanê.

SIMKO CANFEDA (ATÎLLA OZDENÇ)

Hevrêyê me Simko Canfeda (Atîlla Ozdenç) di sala 1995'an de li Wanê di nava malbateke welatparêz de ji dayik bû û bi welatparêziya serhedê û dilsoziya Kurdistanê bi têkoşîna PKK'ê re kir yek û li dijî faşîzm û dagirkeriyê bû xwedî sekneke ku xizmetê ji têkoşînê re dike. Hevrêyê me Simko bi israra xwe ya di têkoşîna azadiyê ya Kurd de û daxwaza xwe ya ji bo serketinê, di nava hevrêyên xwe de bû mînak. Bi sekna xwe ya şoreşgerî ya di nava jiyanê de, li her devera ku lê bû bû hêza çareseriyê û israra jiyana Apoyî. Bi sekna xwe ya dilnizm û dilsoziya xwe ya bi hevrêyan re hevrê Simko di nava hevalên xwe de yekî naskirî bû. Di her dema Tevgera me ya Azadiyê de bi berpirsyariyeke mezin wezîfeyên xwe pêk anî. Li dijî polîtîkayên tinekirinê yên li ser gelê Kurd û Rêber Apo, bi sekna xwe ya milîtanî bersiv da û bû yek ji neferên ruhê fedayî yê PKK'ê.

ŞIYAR MAMO (CEMAL MAMO)

Hevrêyê me Şiyar Mamo (Cemal Mamo) di sala 1993'an de li bajarê Efrînê yê Rojavayê Kurdistanê di nava malbateke welatparêz de ji dayik bû û bû milîtanek ku welatparêziya efrînê ya dîrokî û welatparêziya PKK'ê kir yek. Li dijî êrişên komkujiyê yên li dijî gelê Kurd, li hemberî polîtîkayên îmha û tasfiyeyê yên li ser Rêber Apo, sala 2011'an di dema destpêkirina Şerê Gel ê Şoreşgerî de ji Efrînê tevlî nava refên Têkoşîna Azadiyê ay kurd bû û ji roja ku tevlî bû û pê ve bi dilsoziya xwe ya bi welat û hevrêyên xwe bû nedeferkî têkoşînê û bicihanîna felsefeya Rêber Apo. Bi têgihiştina berpirsyariyê xwe bi pêş xist û bi kedkarî, fedakarî û wêrekiya xwe di nava hevrêyên xwe de bû mînak. Bi berpirsyariyek emezin xwedî li wezîfeyên serdemê derket, xwe ji serdema nû ya şer re amade kir û di vê oxirê de profesyonelî ji xwe re kir esas. Dema ku di nava gel û tevgerê de bû hewl da ji pêvajoyê re bibe bersiv û bû xwedî sekneke milîtanê serdemê.

Di serî de malbatên me yên Araz, Ozdenç û Mamo em sersaxiyê ji tevahiya gelê Kurdistanê yê welatparêz re dixwazin û soz didin ku em ê têkoşîna azadiyê ya ku armanca şehîdên me ye bi serketinê tacîdar bikin."


Mijarên Din