Iraqê daxwaza Tirkiyê ya şerê bi PKK`ê re bi tundî red kir

Endamê Lijneya Asayîş û Parastinê ya Parlamentoya Iraqê Herêm Kemal Axa diyar kir ku Serokwezîrê Iraqê daxwaza Tirkiyeyê a ji bo şerkirin bi PKK`ê re qebûl nekir.

Di 18’ê Çile de Wezîrê Parastinê yê dewleta Tirk a dagirker Hulusî Akar û Fermandarê Giştî yê Artêşa Tirk Yaşar Guler, piştî serdana xwe ya Bexdayê derbasî Hewlêrê bûn û çend hevdîtin kirin. Hate ragihand ku yek ji armanca şandeya Tirkiyeyê ew bû piştgiriya Iraq û Herêma Kurdistanê ji bo êrişkirina PKK’ê peyda bike bû.

Endamê Lijneya Asayîş û Parastinê ya Parlemantoya Iraqê Herêm Kemal Axa têkildarî vê serdanê ji Rojnameya Meda re axivî. Herêm Kemal Axa diyar kir ku di rojên dawî ya sala borî de Tirkiyeyê Bexda agahdar kir ku eger nekare PKK’ê li ser xaka Iraqê derbixe, wê bi xwe wî karî bike û wê erişên berfireh pêk bîne.

Herêm Kemal Axa got;”Şandeya dawî ya Tirkiyeyê ya hatî Iraqê ji bo piştrastkirina wê hişyariyê, pêşkêşkirina bijardeyek din bû. Her wiha dema tinekirina PKK’ê heta dawiya meha Sibatê, yan jî destpêka meha Adarê daye Iraqê. Lê, Serokwezîrê Iraqê Mistefa Kazimî ev gef û pêşniyara Tirkiyeyê bi tundî red kir û dubare kir ku Iraq bi xwe dikare li hember her metirsiya di nava xaka welatê xwe derkeve.”

Endamê Lijneya Asayîş û Parastinê ya Parlemantoya Iraqê Herêm Kemal Axa eşkere kir ku niyeta Tirkiyeyê heye ku bêyî destûra Bexda di nava xaka Iraqê de êriş bike, bi taybet bi guherîna hikûmeta li Whashingtonê re û got;”Lê Iraq bêyî derketina artêşa Iraqê ji nava xaka Iraqê qebûl nake. Niha Tirkiyeyê 30 baregehên leşkerî di nava xaka Iraqê de ava kirine û armanca wan gelekî ji PKK’ê dûr in û mezintir in. Lewma bêyî derketina Tirkiyeyê ya ji nava xaka Iraqê naxwaze, dosya PKK’ê li gel Tirkiyeyê veke.”


Mijarên Din