Ji bo piştgiriya zarokên Kampa Waşûkanî çalakiyeke çandî

Bi dirûşmeya "Bi helbest û stranan em ê xewnên zarokên xwe bixemilînin", Komîteya Çand û Hunerê ya kantona Hesekê bi koordîneya bi Komîteya Çand û Hunerê ya Kampa Waşûkaînî re ji zarokên kampê re çalakiyeke çandî li dar xist.

Di çalakiyê de helbest, stran û şanoyên li ser azadiya zarokan û mehrûmbûna wan ji xwendinê ji ber topbarankirina herêmên wan, hatin pêşandan.

Hevseroka Komîteya Çand û Hunerê ya kantona Hesekê Efaf Heskî li ser armanca çalakiyê wiha got: "Armanca me ya sereke xurtkirina vîna zarokên kampê û piştgiriya wan e. Ji ber ku girêdayî axa bajarê xwe ne. Zarokên kampê heta hefteyekê xwe perwerde kirin û bi xwe şano pêşkêş kirin."

Efaf destnîşan kir ku bi nêzîkbûna salvegera êrişên li ser herêma Serêkaniyê û gundewarên wê re, dê Komîteya Çand û Hunerê ya kantona Hesekê di hundir Kampên Waşûkanî û Serêkaniyê de navendê çandê veke û got: "Amadekariyên çalakiyeke çandî li ser astê Bakur û Rojhilatê Sûriyê tê kirin. Her wiha dê navendên çandê di hundir her du kampan de bên vekirin."

(cx)

ANHA


Mijarên Din