Jinan li Dêrazorê konê çalakiyê veda

Rêveberiya Jinan a herêmên Dêrazorê di bin diruşma "Yekîtiya me serkeftin e, berxwedan parastin e û na ji dagirkeriya Tirkiyê re" konê çalakiyê vegirt.

Di çarçoveya hemleya ku Rêveberiya Jinan a herêmên rizgarkirî (Dêrazor, Reqa, Tebqa û Minbic) bi diruşma "Yekîtiya me serkeftin e, berxwedan parastin e û na ji dagirkeriya Tirkiyê re" ku di 23’yê Tîrmehê de dest pê kiriye, îro konê çalakiyê li hola Meclisa Sivîl a Dêrazorê vegirt.

Bi dehan endamên komîte, saziyên girêdayî Rêveberiya Sivîl a Demokratîk a herêma Dêrazorê, Jinên Ciwan, Buroya Rêxistina Jinan a Partiya Pêşerojê ya Sûriyê şaxê Dêrazorê di bin konê çalakiya ku dê 2 rojan bidome, beşdar bûn.

Di bin kon de endama Meclisa Rêveber a herêma Dêrazorê Leyla Hesen, bi navê Meclisa Qanûnsaz a herêma Dêrazorê Melak Ribah, bi navê Rêveberiya Jinan a Tebqayê Wela Casim, bi navê Rêveberiya Jinan a Reqayê Meryem Cemal, bi navê meclisên xetên rojava û rojhilatê Dêrazorê Etab Ehmed, bi navê Hêzên Ewlekariya Hundirîn Cewahir Mehmûd axivîn. Axêveran gefên dewleta dagirker a Tirk ên li ser herêmên Bakur û Rojhilatê Sûriyê şermezar kirin û diyar kirin ku destwerdana Tirkiyê bi her awayî red dikin. Her wiha tekez kirin dê çalakiyên xwe heta pêkanîna serkeftinê bidomînin.

(fr)

ANHA


Mijarên Din