Jinên ciwan li dijî sûcên Tirkiyê meşiyan

Ji herêma Firatê, Minbic, Reqa, Tebqa û Dêrazorê bi sedan jinên ciwan daketin qadan û sûcên dewleta Tirk a dagirker şeremzar kirin.

Bi sedan jinên ciwan ên ji Reqa, Tebqa, Dêrazorê, Minbic û Kobanê li Qada Jina Azad a bajarê Kobanê hatin ba hev û bi meşekê qetilkirina hersê jinên çalakvan (Zehra Berkel, Hebûn Mele Xelîl û Emîne Weysî) şeremzar kirin ku di 23'yê Hezîranê de di êrişa hawayî ya dewleta Tirk a li ser gundê Helîncê de şehîd bibûn.

Jinên ciwan bi alên Tevgera Jinên Ciwan û wêneyên hersê şehîdan, pankartên bi nivîsên "Îradeya jinên ciwan serkeftina gelan a li hemberî faşîzmê ye, serhildana jinên ciwan tolhildan e, em ê xak û rumeta xwe biparêzin û dagirkeriyê û DAIŞ'ê têk bibin" ber bi gundê Helincê ve dest bi meşê kirin. Di meşê de diruşmeyên silavkirina berxwedana jinên azad hatin qîrkirin.

Jinên ciwan 5 km ser piyan meşiyan û li ber mala ku hatibû bombebarankirin sekinin.

Li vir berdevka Yekitiya Jinên Ciwan a herêma Firatê Xunav Îbarhîm û bi navê jinên ciwan ên Dêrazor û Reqayê Leyla Ebd axivî.

Di axaftinan de serxasî ji malbatên hersê jinên şehîd re hate xwestin û behsa têkoşîna wan hate kirin.

Hate gotin ku Tirkiyê bi hedefgirtina jinan dixwaze îradeya jina azad a berxwedêr ên ku li hemberî DAIŞ û dagirekriyê sekinîn têk bibe. axaftivanan soza mezinkirina têkoşînê dan.

Çalakî bi diruşmeyên silavkirina berxwedana jin û şeremzarkirina dewleta Tirk a dagirekr bi dawî bû.

ANHA

 


Mijarên Din