Jiyan li Hecînê zindî dibe

Şaredariya Gel a bajarokê Hecînê yê ku di demên dawî de ji aliyê QSD‘ê ve ji çeteyên DAIŞ‘ê hatiye rizgarkirin dest bi gelek projeyên xizmetguzariyê kirin û gelek erk pêk anî ye.

Bajarokê Hecîn mîna gelek bajarên Sûriyê di encama şer û mayînên çeteyên DAIŞ`ê de rastî wêrabûnê hatiye. Piştî şervanên QSD‘ê bajarok ji çeteyên DAIŞ‘ê rizgar kirin û ji mayînan û bermehiyên şer paqij kirin, Şaredariya Gel a ku di 4`ê Nîsanê de ava bûye, dest bi gelek projeyên xizmetguzariyê kir û gelek jê pêk anîne. Şaredarî bi vê yekê hêvî dike ku şêniyên vegerin bajarokê.

Ji xebatên girîng ên ku şaredariya nû pêk anî ye:

-Projeya tiba edlî: Ev proje têkildarî rakirina cenazeyên ku bi awayekî bêser û ber belav bûne. Di vê projeyê de cenaze têne belgekirin, piştre di gorên edlî de têne veşartin. Heta niha derdora 35 cenaze ji bin enqazan de hatine rakirin.

-Projeya rakirina enqazan: Di vê projeyê de bendên axî û enqaz ji bajarokê têne rakirin û rojane derdora 200 m3 bermahî ji bajarokê têne derxistin.

-Projeya belavkirina ava vexwarinê: Ji ber ku tevahiya stasyonên ava vexwarinê li herêmê rawestîne, Şaredariya Gel wekî gava destpêkê rojane avê pak dike piştre li tevahiya malên bajarokê belav dike.

-Projeya rakirina çopê: Ji xebatên şaredariyê yên her girîng rakirina sergoyên bê ser û ber ji bajarokê û derxistina wê ji cihên diyar derveyî bajarokê ye da ku rê li pêşiya belavbûna nexweşiya bên girtin, mîna nexweşiya Laşmaniya û gelek nexweşiyên zarokan. 

Gelek şêniyên bajarokê Hecînê di demên cuda de piştî rizgarkirina bajarokê ji hêla QSD`ê ve vegerîne. Lê ji ber tunebûna xebatên xizmetguzariyê gelek ji wan hîna venegerîne.

(şx)

ANHA

 


Mijarên Din