KCK: Divê pêşiya kesên ku îstîxbaratê didin Tirkiyê, bigirin

KCK: Em bang li hêzên siyasî yên Başûrê Kurdistanê dikin ku divê li hemberî êrîşên dagirker helwesta xwe diyar bikin û pêşiya wan kesan bigirin ên ku îstîxbaratê didin dewleta Tirk.

Hevserokatiya Konseya Rêvebir a KCK’ê derbarê êrîşên dewleta Tirk ên li ser Başûrê Kurdistanê daxuyaniyeke nivîskî weşand.

Di daxuyaniya KCK’ê de ev tişt hatin diyarkirin:

“Ji ber êrîşên desthilatdariya AKP û MHP’ê yên li ser Herêmên Parastinê yên Medyayê û Başûrê Kurdistanê gelek sivîl hatine qetilkirin. Bêdengiya PDK, YNK û rêveberiya Herêma Kurdistanê ya li hemberî van êrîşan nayê qebûlkirin.

Dewleta Tirk bi tevgera dagirkeriyê ya li ser Xakurkê êrîşên xwe yên li ser sivîlan zêde kiriye. Bi taybetî bi êrîşên hewayî sivîlan qetil dike. Em sivîlên ku li Xakurk, Goşîne û Kortekê hatine qetilkirin bi bîr tînin û sersaxiyê ji malbatên wan re dixwazin. Qetilkirina sivîlan bûye yek ji parçeyekî vê tevgera dagirker û hewl didin qadên sivîlan were valakirin. Daxuyaniyên rêveberiya Başûrê Kurdistanê û şîroveyên hin çapemeniya li Başûr a ku qetilkirina sivîlan wekî şer diyar dike, rê li ber meşrûbûna êrîşên dewleta Tirk vedike.

Qetilkirina sivîlên li Kortekê jî wekî şerê di navbera artêşa Tirk û gerîlayan hatiye diyarkirin. Li Kortekê cihê ku sivîl lê hatine qetilkirin, tu baregehên gerîlayan tune. Li ser rêya asfalt sivîl hatine qetilkirin. Li vê qadê tu tevgerîna artêşa Tirk tune û nîşandana qetilkirina sivîlan a wekî şer, êrîşên dewleta Tirk meşrû dike.

Ji ber êrîşên desthilatdariya AKP û MHP’ê yên li ser Herêmên Parastinê yên Medyayê û Başûrê Kurdistanê gelek sivîl hatine qetilkirin. Bêdengiya PDK, YNK û rêveberiya Herêma Kurdistanê ya li hemberî van êrîşan nayê qebûlkirin. Gelê Kurd û raya giştî ya li Başûrê Kurdistanê matmayî ne. Ji bo bêdengbûna hêzên siyasî û rêveberiyê tu hincet tune. Heke rêveberiyên heyî û hêzên siyasî li hemberî qetilkirina sivîlan bêdeng bimîne wê îddîaya wan a ku dibêjin em nûnerên gel in jî were nîqaşkirin.

Êrîşên dagirker ên AKP û MHP ne bi tenê li ser PKK’ê ye. Helwesta dewleta Tirk a di dema referandûma serxwebûnê û aloziya li Kerkûkê li holê ye. Li gorî wan Mûsûl û Kerkûk û axa Başûrê Kurdistanê axa wan e. Bi vê re jî Başûrê Kurdistanê tê dagirkirin.  Dema ku ev rastî li holê be, bêdengbûna li hemberî êrîş û qetlîaman tê wateya ku ew jî şirîkên van qetlîaman in.

Hêzên siyasî ne bi tenê dibin şirîkên êrîşên dagirkeriyê, di heman demê de bi rêxistinên îstîxbartê li qadên gerîlayan didin. Bi MÎT’ê re hewl didin cihên gerîlayan eşkere bikin û li wan deran bidin. Bi dehan bûyerên wisa çêbûne. Di destê me de gelek agahî û belge hene ku yekîneyên îstîxbaratê yên li Başûrê Kurdistanê û MÎT’a Tirkan bi hev re dixebitin. Em diyar dikin ku em ê êdî destûrê nedin van rewşan, em ê tevdîran bistînin û em ê ji kesên berpirsyar hesap bipirsin.

Nayê qebûlkirin ku hêzeke siyasî ya Kurd îstîxbaratê bide dijminên hêzeke Kurd. Em bang li hêzên siyasî yên Başûrê Kurdistanê dikin ku divê li hemberî êrîşên dagirker helwesta xwe diyar bikin û pêşiya wan kesan bigirin ên ku îstîxbaratê didin dewleta Tirk.

Em bang li gelê Başûrê Kurdistanê, rêxistinên sivîl ên civakî û hêzên demokrasiyê dikin ku bila li hemberî tevgera dagirkeriya li ser Başûrê Kurdistanê dengê xwe bilind bikin û li hemberî kesên ku li dijî Tevgera Azadiyê bi dijmin re dixebitin jî helwesta xwe zelal bikin û piştgiriyê bidin têkoşîna me ya li dijî dagirkerî û êrîşan.”

 


Mijarên Din