Keldanên li Dêrikê li dijî gefên Tirkiyê meşiyan

Welatiyên Keldan ên bajarê Dêrikê bi meşekê gefên Tirkiyê yên li dijî herêmên Bakur û Rojhilatê Sûriyê şermezar kirin.

Bi dehan şêniyên pêkhateya Keldan ên li Dêrikê bi armanca şermezarkirina gefên dagirkeriya Tirk ên li ser herêmên Bakur û Rojhilatê Sûriyê li dêra Keldan a navenda bajarê Dêrikê kom bûn.

Şênî ku mom di destê xwe de hilgirtibûn ji dêrê ber bi qada Şehîdan ve di nav kolanên sereke de meşiyan û pankartên bi nivîsên ` Ji osmaniya nû re na` hildan.

Piştre berê xwe dan dêra Keldan û li wir deqeyek rêzgirtin ji bo şehîdan sekinîn, ayînên olî pêk anîn û dua kirin (lava kirin) ku aştî li Sûriyê belav bibe.

Piştî wê endamê Buroya Siyasî ya Partiya Yekitiya Suryan Afram Ishaq ji ajansa me re axivî û got: "Ev meş ji hêla dêra Keldan ve ji bo şermezarkirina gefên Tirkiyê li dijî herêmê hate orgenîzekirin. Dirûşmeyên meşvanan banga hezkirin û aştiyê û şermezarkirina gefên Tirkiyê bûn."

Ishaq wiha domand: "Em ji cîhanê re dibêjin tevahiya gel û pêkhateyên herêmê bira ne û li hember her kesê ku aştiya wê dike xeteriyê dibin yek."

(şx)

ANHA


Mijarên Din