Artêşa Tirk a dagirker û çeteyên wê her roj herêmên Girê Spî û Eyn Îsayê topbaran dikin.
Bi taybet gundên Fatse û Hiriyê yên Eyn Îsayê her roj têne topbarankirin. Ji ber wê şêniyên wan gundan ber bi kamp û gundên din ve koçber dibin.
Nûçegihanên ajansa me rewşa koçberên ku niha li Kampa koçberê Girê Spî dimînin, şopandin û nêrînên wan girtin.
Jina bi navê Sara Hesen ji şêniyên gundên Fatse yê girêdayî navçeya Eyn Îsa ye dibêje: “Artêşa Tirk a dagirker bi topên xwe yekser gundê me dike hedef. Di gund de sivîl hene. Mala cîranê me hate hedefgirtin, ji ber wê wêran bû û hinek ji wan birîndar bûn."
Sara di dawiyê de got: "Em neçar man ji gundê xwe der bikevin û ber bi kampa koçberên Girê Spî ve koçber bibin. Em hêvî dikin vegerin malên xwe."
DAGIRKERÎ SEDEMA KOÇBERBÛNA ME YE
Jina bi navê Zelxe Mistefa ya ji gundê Şergirakê yê got: “Artêşa Tirk a dagirker û çeteyên wê sedema koçberbûna me ne. Li wir tu ewlehî tune ye heya ku em di nav malên xwe de bimînin. Ji ber binpêkirinên dagirkerî û tunebûna xebatên xizmetguzariyê me terka gundên xwe kir û berê xwe da herêmên ewle."
(şx)
ANHA
