Komîteyên lihevanînê du êlên Girê Spî li hev anîn

Komîteyên Lihevanînê û şêx êlên Bakur û Rojhilatê Sûriyê nakokiyek çareser kirin û du êlên El-Bû Esaf û El-Hinade piştî ku zêdetirî salek û nîve bi nakok bûn li hev anîn.

Beriya salek û nîvî, nakokiyek di navbera her du êlên El-Bû Esaf û El-Hinade yên kantona Girê Spî de çêbû. Bi armanca rawestandina xwînê û bidawîkirina nakokiyê, komîteyên lihevanînê yên tevahiya herêmên Bakur û Rojhilatê Sûriyê tevî tevlibûna hejmarek ji êlên Ereb û Kurd ên Bakur û Rojhilatê Sûriyê mudexele kirin da ku nakokiyê bi dawî bikin. Ji bo wê celseya lihevanînê îro li dar ket.

Êla El-Bû Esaf 6 kom li gundê El-Menkî yê ku bi 25 km li başûr û rojhilatê bajarê Girê Spî ye vedan. Fermendar û şervanên Meclisa Leşkerî ya Girê Spî, fermendarên Hêzên Sûriye Demokratîk, kesayetên siyasî ji tevahiya herêmên Bakur û Rojhilatê Sûriyê, êl û rûspiyên êlên Kurd û Ereb ên Bakur û Rojhilatê Sûriyê tev li celseyê bûn.

Celseya lihevanînê bi hatina rûsiyên êlên nakok destpê kir. Piştre gelek axaftin hatin kirin jê cîgirê hevserokê Rêveberiya Xweser a Bakur û Rojhilatê Sûriyê Hemdan El-Ebid ê ku bi xêrhatina beşdaran û tevahiya aliyên ku hewl dan celseya lihevanîn li dar bixin kir.

El-Ebid got: "Em hîna bi urf û adetên xwe yên resen ve bi rêya lihevanînê û vegerandina giyana xweşbinî û biratiyê di navbera şêniyên civakekî de girêdayî ne."

Paşê hevserokê Meclisa Rêveber a Rêveberiya Xweser a Bakur û Rojhilatê Sûriyê Ebid Hamêd El-Mihbaş axivî û got: "Di destpêkê de em spasiya xwediyê vê konê yê ku delîlê resenî û mîrxaziyê ye dikin. Ji aliyê xwe ve wek Rêveberiya Xweser a Bakur û Rojhilatê Sûriyê em her du êlên El-Bû Esaf û El-Hinade spas dikin ku zimanê hiş bi kar anîn û lihevanîn qebûl kirin. Her wiha em spasiya hemû kesên ku rolek di vî warî de lîstiye dikin ji şêx, rûspî, rêveberî û leşkerên ku îro di bin banê vê konê de kom bûne ji bo ku bi xwe pirsgirêkên civaka me çareser bikin."

Piştî wê hevserokê Meclisa Rêveber a Rêveberiya Xweser a herêma Firatê Enwer Muslim axivî û spasiya şêx û rûspiyên her du êlên El-Bû Esaf û El-Hinade kir ji ber ku nakokiyên xwe derbas kirin. Muslim diyar kir ku li gel pêvajoya heyî ev lihevkirin,  ji tevahiya aliyên ku hewl didin yekitiya gel tê bibin û ewlehiya herêmê bihejînin re peyameke.

Ji aliyên xwe ve endamê rêveber ê Desteya Edaleta Civakî ya herêma Firatê Bekir El-Ceradê, fermendarê Meclisa Leşkerî ya Girê Spî Riyad El-Xemîs û şêx êla El-Fedan Şêx Mişel Ebû Dahiye serkeftina lihevanînê û kedên ku hatine dayîn spas kirin û hêvî kirin ku giyana biratiyê û hezkirinê di navbera tevahiya civaka sûrî de belav bibe.

Di dawiya de rûspiyên her du êlan hev du hemêz kirin û tekez kirin ku nakokî bi dawî bûye. Piştî wê li gorî urf û adetên êlan xwarin ji beşdaran re hate dayîn.

(şx)

ANHA


Mijarên Din