Li Ewropayê rêveberiyeke nû ya PYD’ê hate hilbijartin

Rêxistina PYD`ê ya Ewropayê rêveberiyeke nû ji 27 endamên ku nûnertiya gelek dewletên Ewropayê dikin, hilbijart.

Bi dirûşma "Bi vîn û birêxistinkirinê em ê Efrînê rizgar bikin û Sûriyeyeke nenavendî û demokratîk ava bikin" Partiya Yekitiya Demokratîk (PYD) a Ewropayê di 30 û 31`ê Adarê de li bajarê Venlo yê Hollandayê bi beşdarbûna 220 endam û cîgirên partiyê ji gelek dewletên Ewropayê, her wiha bi amadebûna bi dehan partiyên Kurd û Kurdistanê, saziyên civaka sivîl û malbatên şehîdan û bi dehan xebatkarên çandê û ragihandinê, kongreyek li dar xist.

Piştî ku kongre bi dawî bû, partiyê daxuyaniyek da raya giştî. Xalên sereke yên daxuyaniyê ev in:

"Ji bo girîngiya merheleyê û girîngiya şopandina pêşketinên siyasî û dîplomatîk,bi  taybet ku gelek berpirsyarî li ser milê PYD`ê ya li Ewropayê di aliyê dîplomasî, siyasî û rêxistinî de dikeve, her wiha di bin dirûşma "Bi vîn û birêxistinkirinê em ê Efrînê rizgar bikin û Sûriyeyeke nenavendî û demokratîk ava bikin" PYD`ê li Ewropayê di roja 30 û 31`ê Adarê de li bajarê Venlo yê Hollandayê bi beşdarbûna 220 endam û cîgirên partiyê ji gelek dewletên Ewropayê, her wiha bi amadebûna bi dehan partiyên Kurd û Kurdistanê, saziyên civaka sivîl û malbatên şehîdan û bi dehan xebatkarên çandê û ragihandinê, kongre li dar xist.

Di axaftinên beşdaran û endamên partiyan de ku di civîna yekemîn de hate kirin, li ser rola sereke ku partiya me ji bo azadiya gelê me li Rojava û hemû pêkhateyên li Bakurê Sûriyê dijîn, hate teqez kirin. Her wiha berpirsyariyên PYD`ê li Ewropayê da ku dengê gelê me bigihîne û nûnertiya wê ya siyasî û dîplomatîk bike û wergera serkeftinên li ser rûyê erdê ji biryarên navneteweyî mîsogeriya pêşeroja Sûriyeyeke nenavendî û demokratîk dike ku hemû gelê Sûriyê bi hev re bijîn.

Her wiha partiyê nirxandina aliyê rêxistinî û dîplomatîk de kir û lêvegera dema kar ji hemû saziyên girêdayî partiyê re kir.

Di dawiyê de, rêveberiyeke nû ji 27 endamên ku nûnertiya gelek dewletên Ewropayê dikin û bi awayekî wekhev û guncaw bi jin û ciwanan re hate bilbijartin. Endamên Meclisa PYD`ê sûnd xwar ku ew ê rêgez û biryarên ji kongreyê derketin, biparêzin û têkoşîna xwe bilindtir bikin da ku bigihîjin armancên partiyê."

(jo)


Mijarên Din