Li herêma Cizîrê hemleya paqijkirinê dest pê kir

Komîteya Hawîrdorê ya Desteya Şaredariyan a Herêma Cizîrê dest bi hemleyeke paqijkirinê kir.

QAMIŞLO

Di salên borî de çopa li ser rêyan kom bûbû, bar li ser welatiyan zehmet dikir. Lewre Komîteya Hawîrdorê ya Şaredariyan a Herêma Cizîrê ji bo sala 2019`an gelek proje û plan danîbûn pêş xwe. Ji wan yek jî rakirina çopê (sergo) bû.

Desteya Şaredariyan, Rêveberiya Herêmî ya Herêma Cizîrê  û Rêveberiya Şaredariyan a Kantona Qamişlo plana xizmetguzariyê ya îsal danî, da ku rewşa xizmetê li hemû bajar, navçe û bajarokên girêdayî wê bi pêş bikeve. Plana destpêkê jî rakirina çopê bû. Gava yekemîn Rêveberiya Şaredariyan a Kantona Qamişlo dest bi belavkirina pakêtên çopê li bajar, navçe û bajarokên girêdayî kantonê kir.

Wekî gava duyemîn, îro Buroya Jinan û bi hevkariya Buroya Hawîrdorê ya navçeya Til Hemîsê dest bi hemleya paqijkirinê bi boneya pêşwazîkirina Roja Jinên Kedkar a Cîhanê kir.

Tê payîn ku Buroya Hawîrdorê ya Şaredariya Gel a Til Hemîsê û şaredariyên girêdayî wê, wekî şaredariyên Ebû Con, Ukaz, Til Ehmed û Ceza hemleyên paqijkirinê li herêmê û nasandina wê di hundirê dibistanan de, vê mehê dê zêde bikin.

Her wiha dê Rêveberiya Şaredariyan a Kantona Qamişlo di demên pêş de pakêtên çopê li herêmên girêdayî navçeya Til Hemîsê belav bike.

Şaredariya Gel a navçeya Til Hemîsê duh pêngavek li navçeyê bi dirûşma "Bi rihê berxwedana Leyla Guven dê têkoşîna rizgarkirina jinan bidome"  û bi hevkariya hemû şaredariyên girêdayî wê dest pê kir. Her wiha ev pêngav jî ji çalakiyên Buroya Jinan a Şaredariyê ji bo pêşwazîkirina Roja Jinan bû.

Tê payîn ku hemleyên fena wê li tevahî bajar, navçe û şaredariyên herêma Cizîrê werin destpêkirin.

(fr)

ANHA


Mijarên Din