Li Reqayê av gihaşt 24 hezar donim erd

Li gundewarên Reqayê komîteyên çandiniyê yên meclisên bajarokên Hemrat û Keramayê sîstemeke avdanê û 2 pompên avê nû kirin. Ev yek dê bandoreke erênî li 24 hezar donim zeviyên çandiniyê bike.

Komîteya Çandiniyê ya Meclisa Gel a Hemratê piştî xebata ku 2 mehan dom kir, sîstema Marûda ya li ser projeya avdanê ya Jorîn a Mezreya Hemrat a rojhilatê bajarê Reqayê, tamîr kir. Her wiha pompên avdanê yên Hemrat û Reqa Semrayê sererast kirin ku avê didin 7 hezar donim zeviyên çandiniyê.

Her wiha Komîteya Çandiniyê ya Hemratê projeya sererastkirina kanala avê ya Raîd ku dirêjahiya ava dide zêdetirî 45 km ye û bi şaxên wê ku dirêjahiya wan 60 km ye, dabû destpêkirin. Di vê çarçoveyê de xetên kanalê hatin paqijkirin û yên bizirar hatin nûkirin.

Komîteya Çandiniyê ya Keramayê jî sererastkirina sîstema Şinênê 1 a projeya jorîn a Keramayê ku nêzî 17 hezar donim zevî av dide, didomîne.

Hevserokê Komîteya Çandiniyê ya Meclisa Gel a Hemratê Abdullah El-Hemada got projeyên avdanê li gundewarên rojhilatê Reqayê ji beriya 8 salan ve nehatine sererastkirin. El-Hemada destnîşan kir ku ew hewl didin çandiniyê li herêmê bi pêş bixin û da zanîn ku şêniyên herêmê ji sedî 85 debara xwe bi çandiniyê dikin.

(bb)

ANHA


Mijarên Din