Li Rojava fermana Şengalê hate şermezarkirin

Li Tirbespiyê, Girkê Legê û kantona Girê Spî ji bo salvegera 5`emîn a Komkujiya Şengalê meş hatin lidarxistin.

Îro salvegera 5`emîn a Komkujiya Şengalê ye ku li ser civaka Êzidî hate kirin. Êzidiyan li ser destê çeteyên DAIŞ`ê ku hemû desteka madî û lojistî ji dewleta Tirk digire, di sala 2014`an de rastî komkujiyeke herî hov hat.

Piştî ku pêşmergeyên PDK`ê  ji Şengalê reviyan û gelê Êzidî di nava pencên çeteyên DAIŞ`ê de hîştin, bi hezaran jinên Êzidî hatin revandin û jin û zarok jî hatin kuştin.

Îro ji bo şermezarkirina komkujiya li ser Êzidiyan Êzidiyên navçeya Tirbespiyê tevî bi sedan ji pêkhateya Kurd, Ereb û Suryan  meşeke şermezarkirinê organîze kirin. Meşvanan teqez kirin ku dewleta Tirk destek da DAIŞ`ê ev yek jî bi hevkariya hin dewletan û hêzên herêmî kir, armanca xwe jî tunekirina hebûna civaka Êzidî û çanda Kurdî ya resen e.

Meş ji pêşiya Navenda Kongreya Star a navçeya Tirbespiyê destpê kir û ber bi Qada Azadî ve dewam kir. Di meşê de, pankartên “Na ji qirkirin û dagirkeriyê re, parastian jina Şengalî parastina hebûna jinê ye” rakiribûn û wêneyên komkujiyên Êzidiyan hildabûn. Meşvanan dirûşmeyên şermezarkirina dewleta Tirk a ku destek da çeteyên DAIŞ`ê beriz kirin.

Meş li Qada Azadî veguherî mitîngê. Piştî bîranîna cangoriyên azadiyê, ji rêveberên Yekitiya Êzidiyan li Sûriyê Leyla Îbrahîm û bi navê şaxê Mala Êzidî ya Tirbespiyê Ziyad Rûstem axivîn.

Axevêran di destpêkê de, spasiya HPG`ê kirin ji ber wan destwerdan kir û gelê Êzidî parastin û di vê oxirê de qurbanî dan, di heman demê de  dewleta Tirk a ku destek da çeteyên DAIŞ`ê di hemû aliyan de di aliyê lojistî, madî û menewî ku sînorê xwe jî  vekir, da ku civaka Êzidî, çand û nasnameya Kurdî ya resen tune bike, şermezar kir.

Her wiha axaftivanan teqez kirin ku komkujiyên ku li ser Êzidiyan hate kirin, wê bimîne lekeyeke reş li ser eniya dewleta Tirk û komplogeran.

Miting bi dirûşmehê şermezarkirina îxanetê û komployên li ser gelê Kurd û nexasim Êzidî li Efrîn û Şengalê bi dawî bû.

GIRÊ SPÎ

Li bajarê Girê Spî jî bi heman boneyê bi dehan kes li qanda bûn û fermana Şengalê û gefên dagirkeriya Tirk ên li ser herêmên Bakur û Rojhilatê Sûriyê şermezar kirin.

Xwepêşandan ji ber Çerxerêya Dadgeha Kevin dest pê kir û heta konê  mertalên zindî yên li ser sînorê Sûriyê-Tirkiyê li taxa Minbetihê dewam kir.

Xwepêşandêran pankartên bi nivîsên" Em êrîşên DAIŞ`ê yên li ser Şengalê û komkujiya der heqê wan de şermezar dikin", alên QSD, YPG, YPJ, YBŞ û wêneyên şehîdan hilgirtin.

Her wiha xwepêşandêran li dijî gefên dewleta Tirkiyê yên li ser herêmên Bakur û Rojhilatê Sûriyê, sloganên"Na ji dagirkeriya Tirkiyê re"berz kirin.

Meş li ber konê çalakiya mertalên zindî veguherî mîtîngê, li vir piştî deqeyeke rêzgirtin hevseroka Meclisa kantona Girê Spî Hêvîn Îsmaîl axivî û got:"Şehîd namirin, saxiyê ji birîndaran re dixwazin û azadî ji girtiyan re, gelên ji bo bi aramî bijîn hatine dinê, her wiha da ku li kêleka xuşik û birayên xwe bi aşîtî, wekhevî û hezkirin bijîn, em jî wek gelê herêmê komkujiya Şengalê ku berdewamiya fermanên berê ye û herî dawîn jî bi hevkariya AKP, komên terorîstan pêk hat şermezar dikin."

Hêvîn Îsmaîl di dewama axaftina xwe de bal kişand ser gefên Tirkiyê yên li ser herêmên Bakur û Rojhilatê Sûriyê û wiha anî ziman"Niha li ser herêmên Bakur û Rojhilatê Sûriyê gef hene, ev jî bi armanca dubarekirina dagirkeriya Osmanî ye. Tirkiyê bi hinceta avakirina herêma bi ewle û bi hinceta parastina ewlehiya neteweya xwe gefan dixwe, lê di rastiyê de dixwaze herêmên Sûriyê û Iraqê ji Deryaya Spî û heta Mûsil û Kerkûkê dagir bike."

Di dawiya axaftina xwe de hevseroka Meclisa Kantona Girê Spî Hêvîn Îsmaîl bi navê gelê herêmê sûcên DAIŞ`ê der heqê mirovahiyê de şermezar kir û wiha got:"Ol a xwedê ye û welat ê her kesî ye."

GIRKÊ LEGÊ

Di salvegera 5`mîn a komkujiya Şengalê de, bi sedan şêniyên Girkê Legê meşek li dar xist.

Meş ji qada Şehîd Xebat Dêrik a Girkê Legê hate destpêkirin û ber bi kolanên serekê yên navçeyê ve meşiyan. Xwepêşandêran pankartên bi nivîsên"Parastina rûmeta jinên Şengalê, parastina hebûna jinan e, na ji qirkirin û dagirkeriyê re"hilgirtin. Her wiha sloganên şermezarkirina komkujiyên der heqê êzidiyên li Şengalê û gefên Tirkiyê yên li ser herêmên Bakur û Rojhilatê Sûriyê berz kirin.

Beşdaran li orta kolana sereke ya navçeyê rawestiyan, paşê deqeyeke rêz girtin. Hevserokê Meclisa Navçeya Girkê Legê Mihemed Cemîl axivî û got:"Em komkujiya Şengalê ku di encamê de bi hezarên şêniyên êzidî bûn qurbanî şermezar dikin, di vê derbarê de em ji hikumeta herêmê re dibêjin; ka helwesta we ya kurdî, heta kengî hun ê di bin bane dijmin de bin?."

Her wiha rêvebera Kongreya Star Henîfa Mihemed axivî û tekez kir ku hejmareke biçûk a Hêzên Parastina Gel li dijî çeteyên DAIŞ`ê şer kirin, lê dikarîn bi hezaran ji êzidiyan biparêzin.

Xwepşandan bi sloganên na ji komkujiya Şengalê re bidawî bû.

ANHA


Mijarên Din

Erdogan dîsa gef xwar