Li Şedadê turnuvayê dest pê kir

Yekitiya Mamostayan bi armanca  kifşkirina hin behreyan tîmeke taybet a dibistanên navçeya Şedadê ava kir û dê beşdarî maça li ser asta herêma Cizîrê bibe.

Yekitiya Mamosteyan li gerînendeya Şedadê turnuvaya bi beşdariya ji 12 tîman ji navçeya Şedadê, gundewarên wê weke Herîrî, Ebdan, Cermiz û Ebû Faris pêk tê, li dar xist.

Turnuvaya ku dê 10 rojan berdewam bike, bi maça tîma Herîrî û Şedadê dest pê kir û bi serketina 3 golan a tîma Herîrî bi dawî bû.

Endamê Yekitiya Mamosteyan ê gerînendeya Şedadê, Elî Cerad bal kişand ser girîngiya kifşkirina behreyên nû yên mamosteyên navçeyê û bilindkirina moralê mamosteyan. Cerad anî ziman ku turnuva dê 10 rojan dewam bike, di dawiyê de dê tîma serkeftî, baştirîn lîstikvan, baştirîn pasdar û tîma di asta duyemîn de  werin hilbijartin.

Cerad got ji bo hilbijartina baştirîn lîstikvanî dê komîteya çavdêriya lîstikvanan hebe û dê tîma beşdarî turnuvayên herêma Cizîrê bibe, were avakirin.

Her wiha mamoste Ehmed Weys axivî û got: "Mîna van turnuvayan asta bedenî ya mamosteyan bilind dike."

Weys di dawiya axaftina xwe de hêviya avakirina turnuvayên basketbolê, kişik û lîstikên din kir.

(eh)

ANHA


Mijarên Din