Li Şêxmeqsûdê tedbîrên Komîteya Parastina Mezextkaran

Tevî dewamkirina qedexeya derketina derve jî komîteyên Şaredariya Gel a Şêxmeqsûd û Eşrefiyê yên bajarê Helebê kontrolkirina sûkan û diyarkirina buhayên kel û pelan didomînin. Her wiha hemleyên zanakirinê yên der barê çawaniya xweparastina ji Koronavîrusê de bi rêxistin dikin.

Bi destpêka biryara Rêveberiya Xweser a qedexeya derketina derve re, komîteyên Şaredariya Gel li taxên Şêxmeqsûd û Eşrefiyê ji bo parastina mezextkaran (mezêxer) erkên xwe yên kontrolkirina sûkê û buhayên kel û pelan dewam dikin.

Komîteya Zimhêrê û Komîteya Parastina Mezextkaran, bi rêk û pêk li ser sûkan digerin da ku çavdêriya buhayên madeyan bikin û di dema derbasbûna wan ji taxê re bi rêya benda kontrolê ya li rojhilatê taxê, diyar dikin. Her wiha çavdêriya fatoreyan tê kirin û buhayên madeyan li gorî lîsteyê diyar dibin.

Her du komîte ji bo şopandina çalakiya firotinê û çavdêriya dema bidawîbûna bikaranîna madeyên xwarinê, gerên xwe li sûkên her du taxan dewam dikin.

Hevseroka Şaredariya Gel a taxên Şêxmeqsûd û Eşrefiyê Rewşen Mûsa piştrast kir ku komîteyên peywendîdar bi hemû derfetên xwe xizmeta gel dikin û parastina wan ji keysbaziyê dikin.

Di heman derbarê de Şaredariya Gel dest bi hemleya parastina ji Koronavîrusê kir. Li ser wê yekê endamên şaredariyê li aliyên rojava û rojhilatê taxa Şêxmeqsûd û Eşrefiyê belavokên girêdayî perspektîfên paqijiyê, dezenfektekirinê û avêtina gilêşê, belav dikin.

 (eh)

ANHA


Mijarên Din