Meclisa Edaleta Civakî ya Reqayê civîna xwe ya salê ya yekemîn lidar xist

Bi dirûşmeya "Pêkanîna edaleta civakî mîsogeriya aramiya civakê ye" Meclisa Edaleta Civakî ya Reqayê civîna xwe ya salê ya yekemîn lidar xist. Di civînê de xebatên sala derbasbûyî hatin nirxandin.

Civîn li Navenda Çand û Hunerê ya Reqayê lidar ket. Dadwer, parêzerên Reqa û Tebqa, nûnerên dîwanên Edaleta Civakî yên Reqa, Tebqa û Keramê, endamên Meclisa Sûriya Demokratîk, şêx û rûspiyên êlên her du herêman, endamên komîteyên lihevanînê yên meclisên rêveber û meclisên gel ên taxan û gundan tev li civînê bûn.

Civîn bi deqeyek rêzgirtin destpê kir. Piştre endamê Meclisa Hevserokatiya Meclisa Sûriya Demokratîk Hesen Mihemed Elî behsa geşedan û aloziyên herêmê kir.

Mihemed Elî diyar kir ku tevî êrişên li ser herêmên Bakur û Rojhilatê Sûriyê lê gel herêmên xwe bi rêve birin û serkeftinên mezin bi dest xistin û got: "Ruxmî rageşiyên hundirîn û derve ku li pêşberî projeya netewa demokratîk de derdikevin me dikarî pergala edaleta civakî ava bikin."

Paşê hevserokê Meclisa Edaleta Civakî ya Bakur û Rojhilatê Sûriyê Îmad El-Keraf rola meclisên edaleta civakî ji bo pêkanîna aramiya civakî li herêmên ku ji çeteyan rizgar bûne destnîşan kir.

Ji aliyê xwe ve hevserokê Meclisa Qanûnsaz a Tebqayê Hamid Ebdulrehman El-Ferec û hevseroka Meclisa Sivîl a Reqayê Leyla Mistefa keda tevahiya aliyên qanûnsaz û dîwanên edaleta civakî pîroz kirin.

Piştî bidawîbûna axaftinan hevserokê Meclisa Edaleta Civakî ya Reqayê Fehid El-Beyrem rapora xebatên meclisê ya salekê xwend. Di nav de rewşa rêxistinî ya dîwanên edaleta civakî û rola wê di pêkanîna edaletê de ji destpêka rizgarkirina herêmê ji çeteyan.

Piştre deriyê pirs û pêşkêşkirina pêşniyaran ji beşdaran re hate vekirin. Hate gotin ku gereke edaleta civakî were xurtkirin û qanûnên fikrê dewleta desthilatdar ji holê were rakirin.

(şx)

ANHA


Mijarên Din