Metirsî hene ku li Kobanê sergo bibe navenda belavbûna nexweşiyan

Bi belavbûna nexweşiya laşmanyayê re li hin gundên Kobanê û derketina rewşên nexweşiya Koronavîrusê li herêma Cizîrê re, sergoyên li Kobanê cihekî mezin di belavbûna nexweşiyan de digirin.

Li kantona Kobanê, li gundên derdora bajêr 4 sergo hene; Belê, Şêx Çobanî, Til Hacib û Sirînê. Ev sergo di nava gelek gundan de cih digrin û metirsî hene ku bibin navenda belavbûna nexweşiyan.

Şêniyên gundan ji ber belavbûna mêş û pêşûyan li cihê sergoyê (çop) bi gilî ne û ditirsin ku bibe sedema mirina sewalên wan û ziyanê bigihîne çandiniyê.

Li ser mijarê hevserokê Komîteya Şaredariyan a Katona Kobanê Hecî Mihemed Hecî got: “Şaredarî domdar gemarê dişewitîne, ji bo komkirina gemarê piştî şewatê tenê alavek hatiye veqetandin. Şaredarî hewl dide li ser sergoyekê kortan bikole û gemarê di wan kortan de bişewitînin da ku zirar negihêje welatî, çandinî û sewalan.”

Rêveberiya Giştî ya Jîngehê dermanên mêş û mûran li sergoyan direşîne, ev tedbîr tenê têrê nake, ji ber ku sergo mezin dibe û çareseriyên heyî têrê nakin.

Gundî jî li bendê ne ku çareserî ji bo parastina zarokên wan ji nexweşiyên mîna laşmanyayê re bê dîtin ku sedema wan gemar e.

ANHA


Mijarên Din