Navenda Çand û Hunerê ya Minbicê hewl dide çanda gelan ji nû ve vejîne

Pêkhateyên bajarê Minbicê bi rêya Navenda Çand û Hunerê hewl didin çanda xwe ji nû ve vejînin. Navend jî bi rêya vekirina dewreyan ku kesên pispor tê de perwerdeyê didin, hewl dide her pêkhateyek xwe bigihîne çand û hunera xwe ya taybet.

SELWA ABDULLREHAM - ŞÎLAN MIHEMED / MINBIC

Di salên derbasbûyî de, pêkhateyên Minbicê ji ber sîstemên desthilatdar rastî pişaftinê hatin. Ev pişaftin gihîşt astekê ku gelek netewe li ser çand û hunera xwe tiştekî nezanin.

Lê piştî rizgarkirina herêma Minbicê ji aliyê Meclisa Leşkerî ya Minbicê û QSD`ê ve, êdî hemû pêkhateyên Minbicê gihîştin azadiya xwe û bi rengekî demokratîk dikarin çanda xwe ji nû ve vejînin. Di vê çarçoveyê de, bi armanca vejandina çandên pêkhateyên Minbicê yên Ereb, Kurd, Tirkmen û Çerkez, Navenda Çand û Hunerê ya Mibicê 20`ê Tebaxa sala 2017`an hate vekirin.

Di navendê de, her pêkhateyekê komeke xwe taybet û bi navên taybet ên wê pêkhateyê ava kirin. Koma Hezkirin û Hêviyê ya pêkhateya Kurd ji 8 endaman pêk tê, Koma Pêşerojê û Şehîd Botan a pêkhateya Tirkmen ji 5 endaman pêk tê, Koma Siqûr Minbic a pêkhateya Ereb ji 15 endaman pêk tê; ji wan 8 jin in û Koma Çerkezî ya pêkhateya Çerkes ji 6 endaman pêk tê; 3 ji wan jin in.

Her komek di hefteyê de 4 rojan perwerdeya xwe di navendê de dibîne. Ji ber piraniya endamên koman xwendekar in û saetên nava rojê diçin dibistanê, perwerdeya xwe bi şev dibînin.

Perwerde ji aliyê kesên pispor ên girêdayî navendê ve têne dayîn. Di dewreyan de, waneyên li ser dîrok û çanda her pêkhateyekê, her wiha dîlan, stran û cilên folklorîk  tên dayîn.

Hevseroka Navenda Çand û Hunerê ya Minbicê Wedha El-Casim têkildarî mijarê axivî û got di koman de kesên temenbiçûk û yên mezin hene û dîlan û stranên taybet ên her pêkhateyekê di dewreyên perwerdê de têne dayîn.

Koordînasyonê Têkiliyên Çandî ya Navenda Çand û Hunerê Casim Tirmiş ku ji pêkhateya Tirkmen e, da zanîn ev gava navenda çandê derfet dide her pêkhateyekê ku jinûve çanda xwe vejîn bikin û wiha dewam kir: “Em perwerdeyên ji bo zindîkirina çanda her pêkhateyekê li bajarê Minbicê bi rêya vekirina dewreyan, dewam dikin. Bi vê yekê, wê her pêkhateyk çanda xwe ya dayikê fêr bibe.”

(kc)

ANHA


Mijarên Din