Partiya Pêşerojê ya Sûriyê salvegera damezirandina xwe pîroz kir

Partiya Pêşerojê ya Sûriyê şaxê Firatê bi boneya salvegera yekemîn a damezirandina partiyê li navçeya Sirîn a başûrê bajarê Kobanê, mîhrîcanek li dar xist.

Partiya Pêşerojê ya Sûriyê şaxê Firatê bi boneya salvegera yekemîn a damezirandina partiyê li navçeya Sirîn a başûrê bajarê Kobanê mîhrîcanek li dar xist. Rêveberên partiyê, serokê partiyê Îbrahîm Qeftan, endam û rêveberên partiyên siyasî, saziyên sivîl û leşkerî yên herêma Firatê û bi sedan şêniyên herêmê beşdarî mîhrîcanê bûn. Mîhrîcan li qada Peymangeha Şehîd Qezafî hat lidarxistin.

Mîhrîcan bi dirûşma "Ji bo Sûriyeyeke demokratîk, pirreng û nenavendî" hate lidarxistin. Di mîhrîcanê de Îbrahîm Qeftan axivî û destnîşan kir ku pêwîstiya aloziya Sûriyê bi sererastkirineke bi temamî di aliyê zîhniyeta desthilatdar û ezeziyetê ya hikûmeta Sûriyê de heye.

Qeftan di axaftina xwe de wiha got: "Em naxwazin Sûriye vegere rêya berê. Tişta ku gelê Sûriyê dixwaze, em wê dixwazin. Em sîstemeke demokratîk û pirreng li ser esasê qebûlkirina aliyên din dixwazin."

Îbrahîm Qeftan di axaftina xwe de behsa hilbijartinên şaredariyan ên li Tirkiyê kir û wiha anî ziman: "Partiya AKP di mezintirîn bajarên Tirkiyê de têk çû. Ji ber armanca wan desthilatdarî û bazirganiya bi çarenûsa gelan bû."

Qeftan her wiha diyar kir ku ji bo hemû gelên Sûriyhê li her derê stratejiyeke wan a nû heye û destnîşan kir ku armanca wan avakirina civakeke siyasî û birêxistinkirî ye.

Di mîhrîcanê de ji rêveberên Partiya Pêşerojê ya Sûriyê ya navçeya Sirînê Bedîa Osman axivî û teqez kir ku damezirandina partiyê li ser esasê çareserkirina aloziya Sûriyê û lîstina rola xwe ya nitşîmanî di avakirina çanda niştîmanî û birêxistinkirina civaka Sûriyê de bû.

Bedîa destnîşan kir ku partiyê gelek civîn bi şepêl, partiyên siyasî, çandî û rêxistinên civaka sivîl re û di nav de hikumeta Sûriyê li ser esasê hevbeşiya di çareserkirina aloziya Sûriyê de, li dar xistin.

Di dawiyê de ji rêveberên Buroya Jinan a Partiya Pêşerojê ya Sûriyê ya Girê Spî Zehra Wîs îşaret bi rola jinan di aliyê siyasî de û hêza wan di aliyê guhertinê de kir. 

Paşê Koma Zerdeşt a girêdayî Navenda Çand û Hunerê ya navçeya Çelebiyê û Koma Şehîd Meûne ya girêdayî Navenda Çand û Hunerê ya Girê Spî stran pêşkêş kirin.

Di dawiya mîhrîcanê de Partiya Pêşerojê ya Sûriyê, Meclisa Malbatên Şehîdan û saziyên leşkerî ji bo xebatên wan xelat kirin.

(bx)

ANHA

 


Mijarên Din