Projeya bidawîkirina pirsgirêka lehiyê ji welatiyan re hate şîrovekirin

Şaredariya Gel a Kobanê ji bo rêgirtina li hemberî lehîyên ku li kolanên Kobanê radibin, projeyek amade kir û ev proje ji gel re hate şîrovekirin.

KOBANÊ

Sala par û îsal ji ber barîna zêde ya baranê, lehî li bajarê Kobanê rabûn. Di encamê de av derbasî malên welatiyan bû û zerarên madî çêbûn. Ji bo çareserkirina vê pirsgirêkê, Şaredariya Gel a Kobanê projeyek amade kir û îro bi civînekê ev proje ji gelê Kobanê re şîrove kir.

Civîn li Navenda Çand û Hunerê ya Baqî Xido bi tevlêbûna bi dehan endamên meclisan û welatiyên Kobanê, hate lidarxistin.

Hevseroka Şaredariya Gel a Kobanê Rewşen Berkel di destpêka civînê de axivî û diyar kir ku ji bo pirsgirêka lehiyan careke din dubare nebe, şaredariyê projeyek amade kir.

Rêveberê Buroya Lêkolîn û Pilansaziyê Kawa Hesik wiha behsa projeyê kir: "Heta ku ev projeya mezin were, wê gelek pirsgirêk derkevin, em dixwazin gel ji me re bibe alîkar da ku  ev proje serkeftî derkeve."

Kawa Hesik proje wiha şîrove kir: "Proje dê 4 mehan berdewam bike, eger tu pirsgirêk dernekevin. Em ê tuneleke mezin ji bo ava lehiyan tê de biherike bi qasî 3-4 km çêkin. Ev tunel ji zanîngehê dest pê dike, derbasî Kolana Şehîd Sariya Ozkon (48) dibe û ji wir jî diçe Qada Şehîd Egîd û ji wir jî diçe herêma pîşesaziyê û ji wir jî derbasî Kaniya Kurdan dibe. Ji ber ku di bin erdê de gelek xetên avê, elektrîk û kanalîzsyonê hene dê pirsgirêk derkevin lê em ê hewl bidin bi hev re van pirsgirêkan derbas bikin."

(şm)

ANHA 


Mijarên Din