Qesas: Komxebata Berlînê gihaşt armanca xwe

Serokê Partiya Nûjen û Demokratîk a Sûriyê Fîras Qesas diyar kir ku komxebata li Berlînê pêwîst bû da ku wêneyeke rast a tecrubeya Rêveberiya Xweser bide nasîn. Qesas  got "Çareseriya aloziya Sûriyê bêyî naskirina pirrengiya olî, kêmnetewe û mezheb û nirxên jiyana hevpar ne pêkan e."

Meclisa Sûriya Demokratîk (MSD) di çarçoveya xebatên xwe yên li derveyî welat de 7 û 8`ê Îlonê li paytexta Almanyayê Berlînê komxebatek li dar xist. 30 kesayetên siyasî, sivîl û hiqûqî yên serbixwe beşdarî komxebatê bûn.

Serokê Partiya Nûjen û Demokratîk Fîras Qesas ê ku tev li komxebatê bûbû, diyar kir ku komxebat pêwîst bû da ku rastiya Rêveberiya Xweser û nêrînên MSD’ê bide naskirin û wiha anî ziman: "Gelek kesayetên opozîsyona Sûriyê û rewşenbîrên Sûriyê Rêveberiya Xweser û nêrînên MSD’ê wêneyek nekêrhatî ku tu têkiliyên wê bi rastiyê re tune ye, dibînin."

Têkildarî girîngiya komxebatên MSD‘ê yên li derveyî welat Fîras Qesas wiha got: "MSD ne ji valatiyekî mîna van komxebatan li dar dixe, lê belê dixwaze hêzeke demokratîk ku bi pirrengiya li Sûriyê bawer be, ava bike. Ev yek jî bi lidarxistina kongreyeke neteweyî ya ji vê hêzê dest pê dike ku dê xeta pêşeroja Sûriyê xêz bike û mîsyona dewletê û saziyên wê û hemû xetên qalind diyar bike ku li gorî wê rêgezên lîstoka demokratîk û hevsengiyên hêzên heyî ava dibe. Ev erekeke sereke ye, gaveke esasî ya ku MSD û yên mîna wê pê armancên xwe pêk bîne."  

Fîras Qesas anî ziman ku komxebatên MSD‘ê yên li derveyî welat gihîştin armanca xwe û wekî gaveke girîng bi nav kir.

Meclisa Sûriyeya Demokratîk li derveyî Sûriyê bi beşdarbûna gelek siyasetmedar, rewşenbîr, akademîsyen û nivîskaran ên opozîsyona Sûriyê 3 komxebatên diyalogan li dar xistine. Komxebata yekemîn 29 û 30‘yê Hezîranê li paytexa Fransayê Parîsê bû, ya duyemîn jî di 12 û 13‘ê Tîrmehê de li paytexta Awusturya Viyanayê bû.

Der barê çareserkirina aloziya Sûriyê de Fîras Qesas ev tişt anî ziman: "Awayên peydakirina çareseriyê hene, ew jî bi rêya amadekirina destûreke nû ku nexşerêya siyasî ya welat ji nû ve xêz bike û têkiliyên saziyên desthilatdariyê û navendaên hêzên li welat li gorî formekê ku serdema desthilatdariyê bi dawî bike û sîstemeke demokratîk li gorî rêbazên demokratîk ji nû ve saz bike, pêkan e."

(şx)

ANHA


Mijarên Din