Rewşenbîrên Reqayê yekîtiya xwe ava kirin

Rewşenbîrên Reqayê bi dirûşmeya "Bi çand û zanistê em ê hebûna xwe xurt bikin" konferansa xwe li dar xistin û yekîtiya xwe ava kirin.

Rewşenbîrên Reqayê bi armanca avakirina yekîtiya xwe konferanseke li dar xistin. Di konferansa ku li Navenda Çand û Hunerê hate lidarxistin de rewşenbîrên Reqa, Tebqa, endamên Meclisa Sivîl a Reqayê û şêx û rûspiyên herêmê û rewşenbîrên herêmên Firat û Cizîrê wekî mêvan beşdarî konferansê bûn.

Konferans bi bîranîna şehîdên têkoşîna azadiyê dest pê kir. Paşê bi navê Komîteya Çand û Hunerê ya Reqayê Hesen Mustefa axivî, bi xêrhatina beşdaran kir û lidarxistin konferansê li xelkên Reqayê pîroz kir.

Mustefa got: "Em îro li bajarê çand û wêjeyê li bajarê Reşîd kom bûn, armanca me em hevgirtina xwe xurt bikin da ku bajarê xwe veguherînin paytexeke çandê."

Bi navê Rêveberiya Jinan a Reqayê Xaliya Kecwan jî axivî û got: "Roj bi roj bajarê me geş dibe. Her kesî dît bê çawa gelên Bakur û Rojhilatê Sûriyê di bin zulma desthiltdaran û tarîtiyê jiyan û çanda me hate temirandin, lê bi saya fikrê Rêberê Neteweya Demokratîk Abdullah Ocalan jin azadiya xwe bi dest xist û jiyana çandî ya gelan vegeriya."

Piştî axaftinan, rêziknameya ji aliyê Komîteya Amadekar ve hatibû amadekirin, hate xwendin, piştî nîqaşkirin û guhertina hin bendên wan, ji aliyê beşdaran ve hate erêkirin.

Di berdewama konferansê de, hilbijartin pêk hatin. Li gorî piraniya dengan (Rîm El-Hemûd, Bitûl Qawiq, Emel Etar, Ehmed El-Birsan, Elî Xisara, Ebdulrehman El-Ehmed û Micewl El-Ehmed) wekî rêveberên Yekîtiya Rewşenbîrên Reqayê hatin hilbijartin.

Konferans bi xwendina encamnameyê konferansê ji aliyê endamê Komîteya Amadekar Mensûr El-Reşîd ve hate xwendin. Di encamnameyê de plansaziya demên pêş hatin rêzkirin, ji wan lidarxistina mîhrîcana salane ya Reşîd e.

ANHA


Mijarên Din