Rêveberiya Xweser 5 zarok radestî hikumeta Norwecê kirin

Daîreya Têkiliyên Derve ya Rêveberiya Xweser, 5 zarokên sêwî yên çeteyên DAIŞ`ê ku bi eslê xwe ji Norwecê ne, radestî nûnerê hikumeta Norwecê ku serdana herêmên Bakurê Sûriyê dike, kirin.

Nûnerê Wezareta Karên Derve ya Norwecê Kristen Nytland di 2`yê Hezîranê de bi awayekî fermî serdana herêmên Bakur û Rojhilatê Sûriyê kir. Nûnerê hikumeta Norwecê bi rayedarên Daîreya Têkiliyên Derve ya Rêveberiya Xweser a Bakur û Rojhilatê Sûriyê re rûnişt û rewşa mirovî li herêmê û gelek doz ji wan rewşa zarokên DAIŞ`î yên Norwecê ku li kampa Holê ne, hate nîqaşkirin.

Piştî civîna 2 saetan ku ji dezgehên çapemenî re girtî bû, hevserokê Daîreya Têkiliyên Derve Ebdulkerîm Umer û nûnerê Wezareta Karên Derve ya Norwecê belgeya radestkirina 5 zarokên DAIŞ`î yên bi eslê xwe ji Norwecê ne, mohr kirin. Şervanên QSD`ê her 5 zarokên norwecî di şerê li dijî DAIŞ`ê de li Baxozê dîtin û piştre ew anîn kampa Holê.

Kristen Nytland ji ajansa me re axivî û û spasiya Rêveberiya Xweser li ser destekdayîna rêveberiyê ji bo welatiyên Norwecê li herêmê û diyarkirina nasnameyên 5 zarokên sêwî, spasiya rêveberiyê kir.

Nytland got: “Em ê 5 zarokan bibin Norwecê û em alîkariya Rêveberiya Xweser di vê mijarê de ji bîr nakin.”

Berdevkê fermî yê Daîreya Têkiliyên Derve Kemal Akif jî li ser malpera wan a fermî ragihand ku wan roja duşemê li ser daxwaza Norwecê 5 zarokên norwecî radest kirin.

Akif wiha got: “Li ser esasê bawerî û erkên Rêveberiya Xweser a Bakur û Rojhilatê Sûriyê ku bi rêgezên mafên mirovan û qanûnên navdewletî bawer dike, îro li navenda Têkiliyên Derve li bajarokê Eyn Îsa, 5 zarokên sêwî yên norwecî ku ji malbatên rêxistina DAIŞ`ê ya terorîst in, radestî şandeya Wezareta Karên Derve ya Norwecê li gorî belgeya radestkirinê ya di navbera her du aliyan de ku li ser mohr kirine, hatin kirin.”

(kc)

ANHA


Mijarên Din