Şahiya rizgarkirina Minbicê bi dawî bû

Şahiya salvegera rizgarkirina Minbicê bi pêşendana berhemên hunerî û gerandina xelekên govendê bi dawî bû.

Şahiya salvegera sêyemîn a rizgarkirina bajarê Minbicê vê êvarê bi tevlibûna bi hezaran şêniyên bajêr li dibistana El-Xensaniye li dar ket. Di şahiyê de gelek axaftin hatin kirin û pesna rola şêniyên Minbicê di rizgarkirina bajar de hat dayîn.

Piştî axaftinan komên hunerî berhemên xwe li gorî bernameyek diyar pêşkêş kirin. Destpêkê koma Koral a navenda Baqî Xido ya Çand û Hunerê ya Kobanê berhemên xwe pêşan dan. Piştra Rêveberiya Sivîl a Demokratîk a Minbicê û gundewarê wê xelat dan Meclisa Leşkerî ya Minbic û Hêzên Ewlekariya Hundirîn a Minbicê.

Piştî wê koma Çerkezî ya govendê dîlana gelêrî ya Çerkezî pêşkêş kir. Paşê koma Zarokên Şehîdan strana xwe, koma Botan a Turkman govenda gelêrî ya Turkmanî pêşkêş kirin. Koma Erebî govenda Erebî, koma Hezkirin a Stranê ya girêdayî Navenda Çand û Hunerê ya Minbicê berhemên xwe pêşkêş kirin.

Her wiha koma Minbicê ya şano ya girêdayî Navenda Çand û Hunerê ya Minbicê şanoyek bi navê Mil bi Mil, koma Navenda Çand û Hunerê ya stranan bi sê zimanan (Kurdî, Erebî û Turkmanî ) stran vegot.

Di dawiyê de şêniyên bajarê Minbicê û hêzên Meclisa Leşkerî ya Minbicê  xelekên govendê li ber stranên Koma Navenda Çand û Hunerê gerandin.

(şx)

ANHA


Mijarên Din