Şehîd Yasir Hisên li Şedadê hate oxirkirin

Şêniyên navçeya Şedadê yên ku beşdarî merasîma oxirkirina şervanê QSD`ê Yasir Hisên bûn, tekez kir ew ê heta pêkanîna armancên şehîdan şopdarên rêya wan bin. Yasir Hisên dema li bajarokê El-Siwer bi erka xwe radibû, şehîd bûbû.

Girseya gel cenazeyê şehîd Yasir Hisên (Xalid) ji pêşiya Meclisa Malbatên Şehîdan a bajarê Hesekê wergirt.

Girse bi karwaneke erebeyên ku bi wêneyên şehîd Yasir hatibû xemilandin, ber bi Goristana Şehîdan a Şedadê ve bi rê ket. Li goristanê, merasîmê bi bîranîna cangoriyên azadiyê dest pê kir. Paşê ji aliyê şervanên QSD`ê ve toraneke leşkerî hate lidarxsitin. Piştî torenê ji fermandarên QSD`ê Ehmed El-Cedûa axivî û sersaxî ji malbata şehîd re xwest.

El-Cedûa destnîşan kir ku bi saya şehîdan wan karîbû şêniyên xwe yên li Dêrazorê ji çeteyên DAIŞ`ê rizgar bikin û destkeftiyên şoreşa li Bakurê Sûriyê parast.

Ehmed El-Cedûa di dawiya axaftina xwe de soza şopandina rêya şehîd Yasir û hemû şehîdan da heta pêkanîna armancên ku şehîdan di oxira wan de canê xwe daye da ku li Bakur û Rojhilatê Sûriyê çeteyan têk bibin.

Paşê, li ser navê Saziya Malbatên Şehîdan a Şedadê Nacî Nicûm axivî û wiha got: "Bi saya şehîdan em ji çeteyan rizgar bûn, em wek Saziya Malbatên Şehîdan ji bo rizgarkirina şêniyên xwe ji terorê, çi ji destê me were em ê pêşkêş bikin."

Piştî bidawîkirina axaftinan nasnameya şehîd ji aliyê endama Saziya Malbatên Şehîdan Zehra Ehmed ve hate xwendin û radestî malbata şehîd Yasir hate kirin. Di dawiya merasîmê de şehîd Yasir di nava sloganan de li Goristana Şehîdan a Şedadê hate oxirkirin.

(eh/kc)

ANHA


Mijarên Din