Şehîdên Berxwedana Rûmetê bi merasîmeke heybet hatin veşartin

Bi hezaran şêniyên Hesekê û gundewarên wê, bi merasîmeke bi heybet cenazeyên 3 şehîdên Berxwedana Rûmetê li Goristana Şehîd Dijwar a li gundê Dawûdiyê spartin axê. Di merasîmê de nasnameyên 5 şehîdan hatin ragihandin.

Girseya gel cenazeyê her sê şehîdan ``Ehmed Ebdullah (Egîd Hesekê), Hesen Salih (Firat Hesekê) û Sîrac Mûrad (Îzêl Badînî) ji pêşiya Meclisa Malbatên Şehîdan wergirtin û bi karwanekî bi dehan erebeyan ku bi wêneyên şehîdan hatibûn xemilandin, ber bi Goristana Şehîd Dijwar a li gundê Dawûdiyê ya bakurê bajarê Hesekê, ketin rê.

Merasîm bi deqeyeke rêzgirtin û turoneke leşkerî ya ji aliyê şervanên YPG û YPJ`ê ve destpê kir. Paşê li ser navê Serokatiya Karûbarên Şehîdan Welîde Botî axivî û got:"Em li pêşiya şehîdên ji bo rûmet û azadiya gelê Bakur û Rojhilatê Sûriyê fedakarî dane, bejin ditewînin û dibêjin ku dewleta Tirk û çeteyên wê dixwazin destkeftên bi fedakariya şehîdên me yên qehreman hatine pêk anîna, têk bidin."

Ji fermandarên QSD`ê Ziyab El-Hesekê jî axivî û sersaxî ji malbatên şehîdan re xwest û wiha got: ‘‘ Em ji xwe û malbatên şehîdan re yên ji bo jiyana hevbeş bi canê xwe dane sersaxiyê dixwazin û soz didin heta dawiyê em ê li ser rêya wan bimeşin.‘‘

Paşê nasnameyên her sê şehîdan ji aliyê endama Meclîsa Malbatên Şehîdan Rojda Ehmed ve hate xwendin û radestî malbatê hate kirin.

Di merasîmê şehadeta 5 şervanên Berxwedana Rûmetê`` Yûsif Omer (Intiqam Hesekê), Mihemed Ebdullah (Mezlûm Hesekê), Ebdulhemîd Elî (Rohat Hesekê), Malik Elî (Kabar Hesekê) û Zubêr Hiso (Goran Hesekê ) hate ragihandin û nasnameyên wan radestî malbatên wan hatin kirin.

Di dawiya merasîmê de, cenazeyê hersê şehîdan Ehmed Ebdullah, Hesen Salih û Sîrac Mûrad di nava tilîliyên dayikan û siloganên dilsoziya bi şehîdan re hatin veşartin.

(rr)

ANHA


Mijarên Din