Serokê Meclisa Êlên Lîbyayê: Em amade ne li dijî dewleta Tirk bisekinin

Îro serokê Meclisa Bilind a Şêx û Rûspiyên Lîbyayê Mihemed Misbahî diyar kir ku şêniyên êlan mafdar in parastina welatê xwe bikin û li dijî êrişên dewleta Tirk bisekinin.

Tora Erebiyê daxuyand ku Mihemed Misbahî da zanîn ku yên cihê xwe di nav artêşa nîştimanî ya Lîbyayê de digirin, endamên êlan in, heke Tirkiye xeta Sirtê-Cefa derbas bike ew ê êl li Lîbyayê piştgiriya destwerdana Misirê bikin.

Misbahî destnîşan kir ku heke dewleta Tirk xeta Sirtê-Cefra derbas bike ew ê bi milyonan kes çekê rakin , her wiha endamên êlan bi girseyî cihê xwe di nava artêşa nîştimanî ya Lîbyayê de bigirin, ji ber ku ji bilî Misir û hin dewletên Ereban gelek dewletan bi wan re “xiyanet” kiriye.

Mihemed Misbahî got ew ê nehêlin artêşa Misirê bi tena xwe li Lîbyayê şer bike, lê belê dê şandeyek serdana navenda Kombûyîna Erebî bike û xwe ji hikumeta Wîfaqê vekişîne. Misbahî di dawiya axaftina xwe de anî ziman ku rola wan derbaskirina Lîbyayê ber bi hilbijartinan ve ye û hikumeteke sivîl ava bike.

Berdevkê Meclisa Bilind û Rûspiyên Lîbyayê Abdulkerîm Urfî kifş kir ku li ser banga serokê Misirê Abdulfetah El-Sîsî êlan lîsteya navên ciwanên ku dixwazin tev li perwerdeyê bibin, amade kiriye ku şerê dewleta Tirk a mêtinger û milîsên wê bikin.

Abdulkerîm Urfî bal kişand ser ku ew ê rê nedin Îxwanan ku xêr û bêra Lîbyayê talan bikin û ew ê li dijî xewnên serokkomarê Tirk Recep Tayyîp Erdogan bisekinin.

(eh)


Mijarên Din