Şêniyên Cirniyê dîwarê parçekirinê red kir

Şêniyên Cirniyê ya Tebqayê di saetên derengiya şevê din de bi armanca şermezarkirina kiryarên dewleta Tirk a dagirker, binpêkirinên wê li ser xaka Sûriyê, hewldanên qutkirina Efrînê û lêkirina dîwarê parçekirinê, xwepêşandanek li dar xist.

Bi sedan şêniyên bajarokê Cirniyê û gundewarên wê li gundê Mamare yê başûrê rojavayê bajarok xwepêşandanek li dar xist. Di meşê de meşale û pankartên bi nivîsa "Na ji bêdengiya  navdewletî re” û “Bêdengiya navdewletî îrade û israra me zêde dike” hatin rakirin û dirûşmên li dijî dagirkeriya Tirkiyê û silavkirina berxwedana Efrînê hatin berzkirin.

Meş li ber dibistana gund veguherî mitîngê. Di mitîngê de ji rêveberên Meclisa Cirniyê Henan Xelef û ji rêveberên Mala Jinan Ayat Xelef axivîn.

Di axaftinan de kiryarên dewleta Tirk a dagirker û binpêkirinên mafên mirovan li Efrînê û herêmin din û bêdengiya navdewletî hatin şermezarkirin. Her wiha hate gotin ku jinan li Efrînê para herî zêde ji binpêkirinan artêşa Tirk a dagirker û çeteyên wê, para xwe hilda.

Di axaftinan de hate tekezkirin ku berxwedan heta rizgarkirina her bihosteke xaka Sûriyê ji dagirkeriya Osmanî ya faşîst dê dewam bike û xeyalên jinûveavakirina serdema Osmaniyan tiştekî ne pêkan e.

Mitîng bi dirûşmên silavkirina berxwedana Efrînê bi dawî bû.

(bx)

ANHA


Mijarên Din