Şêniyên Dirbêsiyê û Zirganê salvegera 15`ê Tebaxê pîroz kir

Şêniyên navçeyên Dirbêsiyê û Zirganê salvegera 37`an a Pêngava 15`ê Tebaxê bi dirûşmeya "Bi rihê berxwedana 15`ê Tebaxê dê têkoşîna gerîla bi ser bikeve û xiyanet û dagirkerî dê têk biçe" pîroz kir.

Şahî bi tevlêbûna bi sedan şêniyên navçeyên Dirbêsiyê û Zirganê, nûnerên partiyên siyasî  û endamên saziyên sivîl û leşkerî li qada geracê ya bajarê Dirbêsiyê li dar ket.

Piştî deqeya rêzgirtin a bîranîna şehîdan, bi navê PYD`ê Mihemed Xelef got, 15`ê Tebaxa 1984`an fermandar Egîd bi komeke hevalên xwe li dijî duyemîn dewleta di NATO`yê de ku ew jî dewleta Tirk a dagirker e dest bi şerê çekdarî kir.

Xelef destnîşan kir ku  15'ê Tebaxê ji bo gelê Kurd ê li parçeyên Kurdistanê roja xilasiya ji zilmê ye û got: "Fîşekên ku di 15`ê Tebaxê de hatin teqandin parçeyên Kurdistanê ya dagirkirî  ku ji aliyê dewletên kapîtalîst ve hatiye dabeşkirin kir yek. 15`ê Tebaxê roja rizgarkirina hebûna Kurd e, roja yekitiya gelan û roja vejînê ye."

Bi navê Kongreya Star endama kongreyê Ebîr Hesen axivî û Pêngava 15`ê Tebaxê li Rêber Abdullah Ocalan û gerîlayên li çiyayên Kurdistanê û hemû gelê Kurd pîroz kir.

Ebîr Hesen da zanîn ku bi damezrandina Rêveberiya Xweser a û avakirina hêzên leşkerî reew îro berhemên roja 15`ê Tebaxê didin hev.

Ebîr Hesen ev li gotina xwe zêde kir: "Ji bo gelê Kurd roja 15`ê Tebaxê destpêka xeta têkoşîn û berxwedanê ye, tu kes nikare dawî li vê têkoşînê bîne, isbata vê yekê jî ev 3 meh in ku gerîla li çiyayên Kurdistanê li hemberî çekên herî pêşketî li ber xwe dide."

Ebîr Hesen wiha dawî li gotina xwe anî: "Em di tevgera jinan li Bakur û Rojhilatê Sûriyê de em ê şopdarên xeta têkoşîn û berxwedana bin ku roja 15`ê Tebaxê ji hemû jinên Kurd û jinên cîhanê re xêz kiriye."

Şahî bi stranên Koma Zîlan ên şoreşgerî û follklorî û gerandina govendan bi dawî bû.

 (eh)

ANHA


Mijarên Din