Şêniyên Tebqayê konê çalakiyê danî

Meclisa Sivîl a Tebqayê îro li bajarê Tebqayê ji bo şermezarkirina binpêkirinên artêşa Tirk û çeteyên wê yên li dijî gelên Bakur û Rojhilatê Sûriyê, konê çalakiyê li parka navenda çandê ya Tebqayê danî.

Li kon alên QSD`ê, wêneyên şehîdên Berxwedana Rûmetê û wêneyên komkujiyên ku dagirker û çeteyên wê li ser zarokan pêk anîn, hatin daliqandin.

Hevserokê Meclisa Tebqayê Elûş El-Xidir daxuyaniyek der barê vekirina konê çalakiyê da, tê de behsa komkujiyên ku artêşa Tirk a dagirker û çeteyên wê ji destpêka êrişan di 9`ê Cotmehê ve pêk tîne, kir û destnîşan kir ku armanca Erdogan dagirkirina xaka Sûriyê û guhertina demografiya herêmê ye.

Daxuyaniyê îşaret bi lehengiya QSD`ê di Berxwedana Rûmetê de û ked û xebata MSD`ê ji bo dîtina çareseriyên guncaw ji bo rawestandina “Osmaniyên nû” li herêmê, kir.

Di roja yekemîn a kon de, şandeyek ji şaxê Partiya Pêşerojê ya Sûriyê ya Tebqayê serdan kir. Serokê şaxê Mûsene Ebdilkerîm axivî û îşaret bi hevgirtina di navbera hemû pêkhateyên gel de ji bo têkbirina êrişên Tirkiyê kir.

Her wiha şandeyek ji gerînendetiya tomarkirina sivîl li Tebqayê serdan kir. Endamê gerînendetiyê Sead El-Elî axivî û destnîşan kir ku êrişên dagirkeriya Tirkiyê hişt ku careke din DAIŞ vegere û gelek çalakiyên terorîst li dijî sivîlan pêk bîne û daxwaz ji civaka navneteweyî kir ku sînorekî ji êrişan re deyne û Erdogan darizîne.

Dê kon 3 rojan dewam bike.

Ev demek e çalakiyên gel li hemû bajarên Bakurê Sûriyê li dijî êrişên artêşa Tirk a dagirker û pêkanîna komkujiyan li ser sivîlan û di serî de jin û zarokan, pêk tên.

(jo)

ANHA


Mijarên Din