Xorşîd Delî: Erdogan hewl dide ji Peymana Lozanê xilas bibe

Lêkolîner û pisporê kar û barên Tirkiyê Xorşîd Delî destnîşan kir ku tevgerên Tirkiyê di herêmê de di çarçoveya hewldanên Erdogan ên xilasbûna ji Peymana Lozanê û vegera li Mîsakî Millî de ne.

Dewleta Tirk a dagirker gefên xwe yên li dijî herêmên Bakur û Rojhilatê Sûriyê didomîne û bi rêya êrîşên leşkerî yan jî hinceta “herêma ewle” hewl dide herêmê dagir bike û planên xwe di herêmê de bi cih bîne. Girêdayî vê mijarê lêkolîner û pisporê kar û barên Tirkiyê Xorşîd Delî ji ANHA‘yê re axivî.

Xorşîd Delî anî ziman ku Erdogan hewl dide ji Peymana Lozanê xilas bibe û li Mîsaka Millî vegere û diyar kir ku tevgerên Tirkiyê yên ji Kuristana Bakur heta rojhilatê Deryaya Spî û rojhilatê çemê Firatê di vê çarçoveyê de ne û wiha got: "Erdogan texmîn dike ku derfet dîtiye ku bikare ji pêşketinên heyî yên li herêmê sûdê wergire, herêmên nû bixe bin serweriya xwe û ji bo vê yekê hêzê bi kar bîne, tevî ku siyasetên wî qanûn û pîvanên navdewletî binpê dike û gelên herêmê û hêviyên wan ên azadiyê dixe xetereyê."

Gefên Erdogan ji bo avakirina “herêma ewle” şantaj in

Delî diyar kir ku gefên Tirkiyê yên li ser Bakur û Rojhilatê Sûriyê xetereyeke cidî ne, divê li ser were sekinandin û wiha pê de çû: "Divê were naskirin ku Tirkiye bêyî lihevkirin û peymanan bi aliyê Amerîkayê re nikare operasyoneke leşkerî pêk bîne. Lê heta niha tiştek wisa nîn e. Piraniya gefên Tirkiyê zextên siyasî û şantaj in. Armanc jê ew e ku rêveberiya Amerîkayê mercên Tirkiyê yên avakirina herêma ewle qebûl bike, şertên wê yê sereke jî ew e ku rojhilata Firatê bixe bin serweriya xwe û pêkhateyên herêmê ji bo berjewendiyên xwe bi kar bîne."

Delî wiha pê de çû: "Li gorî daxuyaniyên Amerîkayê, pêkanîna van şertan ku dê li ser hesabê hêzan û rola Amerîkayê be, dûr e. Ji ber vê yekê em dibînin ku dan û standinên zehmet di navbera her du aliyan de di vî warî de çêdibin. Ev jî yekitî û berxwedanê ji pêkhateyên rojhilatê Firatê dixwaze da ku planên Tirkiyê werin pûçkirin."

Nakokiyên di navbera Tirkiye û Rûsyayê de

Lêkolîner Xorşîd Delî bal kişand ser hevbendiya Tirkiye, Rûsya û Amerîkayê û wiha domand: "Texmîn nakim ku hevbendiya nû ya Tirkiye û Rûsyayê sabit be, bi taybet ji ber ku nakokiyên mezin di navbera her du aliyan de li ser Ukrayna û Idliba Sûriyê hene."

Xorşîd Delî diyar kir ku ya sabit ew e ku Rûsya dixwaze Tirkiye ji NATO‘yê derkeve, lê Tirkiye jî hewl dide ji nêzîkbûna xwe ji Rûsyayê re sûdê wergire da ku ji bo berjewendiyên xwe hin tazmînatan ji Ewropa û Amerîkayê bigire.

Delî destnîşan kir ku hin xalên lewaz û xeternak di dewleta Tirkiyê de hene û got: “Dibe Erdogan li ser nakokiyên di navbera dewletên Rojava û Rûsyayê de lîstokan bike. Ev xal veguherîn krîzên ewlehî û siyasî ku siyaseta Erdogan dixe xetereyê, nexasim ku krîza hundirîn di demên dawî de mezin bûn. Ev hemû diyarde, li Tirkiyê rê li ber pêvajoyeke nearam vedikin."

(bb)

ANHA


Mijarên Din